600 месцаў на канцэрт Вольскага ў Менску разышліся за 55 хвілін
- 23.03.2018, 17:05
Заўтра музыка выступіць у клубе «Бруге» ў гонар 100-годдзя БНР.
24 сакавіка ў менскім клубе «Бруге» адбудзецца бясплатны канцэрт Лявона Вольскага з гуртом Volski ў гонар стагоддзя Беларускай Народнай Рэспублікі, паведамляе «Еўрарадыё».
«Мы не маглі не адзначыць гэтую дату ў Менску», - напісаў музыка ў Facebook.
На святочны канцэрт, які пачнецца а 16 гадзіне, патрапяць першыя 600 чалавек, якія зарэгіструюцца онлайн на сайце і атрымаюць пацвярджэнне на мэйл. Паводле інфармацыі журналістаў, месцы ўжо зарэзервавалі 600 чалавек.
Адразу пасля канцэрту гурт з'язджае ў Беласток, дзе выступіць 25 сакавіка на святкаванні стагоддзя БНР, якое ладзяць беларусы Падляшша.
Акрамя таго 25 сакавіка Лявон Вольскі возьме ўдзел у канцэрце ля Опернага тэатра ў Менску праз тэлемост. 22 сакавіка Лявон Вольскі выпусціў новую песню «Героі не паміраюць», прысвечаную стагоддзю БНР.