Выпускныя іспыты за курс сярэдняй школы могуць змяніцца ўжо да 2020 года

• 21.03.2018, 16:36

Міністр Карпенка рыхтуе новыя змены ў сістэме адукацыі.

Агульнаадукацыйны тэст за курс сярэдняй школы можа з'явіцца да 2020 года. Пра гэта паведаміў міністр адукацыі Ігар Карпенка падчас онлайн-канферэнцыі на сайце БелТА.

Форма выпускнога іспыту за курс сярэдняй школы павінна адпавядаць форме паступлення ў ВНУ, мяркуе міністр адукацыі.

Са слоў Ігара Карпенкі, комплексны агульнаадукацыйны тэст - гэта ўмоўнае паняцце.

- Сёння форма атэстацыі за курс сярэдняй школы не адпавядае форме атэстацыі пры паступленні ў вышэйшыя навучальныя ўстановы. Раней, калі мы пісалі ў школе сачыненне, то выразна ведалі, што пры паступленні ў ВНУ таксама будзем пісаць сачыненне. А цяпер атрымліваецца так: я пішу пераказ, пішу кантрольную работу па матэматыцы ў школе, а пры паступленні ў ВНУ здаю тэсты - зусім іншая форма атэстацыі. Таму для нас відавочна, што форма выпускнога іспыту за курс сярэдняй школы павінна адпавядаць форме паступлення ў вышэйшую навучальную ўстанову, - сказаў ён.

Міністр адзначыў, што цяпер гэтыя пытанні ўжо прапрацоўваюцца спецыялістамі інстытута развіцця адукацыі, Нацыянальнага інстытута адукацыі і акадэміі паслядыпломнай адукацыі разам з педагагічнай грамадскасцю. Чакаецца, што новаўвядзенне запрацуе да 2020 года.

Пра тое, што ў Беларусі плануюць праводзіць агульнаадукацыйны тэст у якасці выпускнога іспыту пасля 11 класаў, Ігар Карпенка казаў на рэспубліканскім педсавеце яшчэ ў жніўні 2017 года.