У Дубаі з'явяцца першыя ў свеце «разумныя» аўтанумары
- 19.03.2018, 18:35
Дубай стане першым горадам у свеце, які ўкараніць такую сістэму.
Упраўленне па дарогах і транспарце (RTA) у Дубаі запускае выпрабаванні «разумных» аўтамабільных нумароў, лічбы, дызайн і іншая інфармацыя на якіх могуць быць зменены ў лічбавым выглядзе без замены самой нумарной таблічкі, паведамляе yaizakon.com.
Дубай стане першым горадам у свеце, які ўкараніць такую сістэму, падкрэслілі ў RTA. Гэты крок з'яўляецца часткай ініцыятыў па ператварэнні Дубая ў «самы разумны горад у свеце».
«Запуск гэтых «разумных» аўтанумароў у Дубаі выкліча фундаментальны зрух у канцэпцыі дарожнага руху, а таксама ў тэхналагічнай транспартнай інфраструктуры», - заявілі ў RTA.
Паводле іх слоў, такія нумары можна будзе кантраляваць цэнтралізавана і з іх дапамогай выключыць імавернасць крадзяжу як нумароў, так і саміх транспартных сродкаў.
«Будзе магчыма аб'яднаць нумары з сістэмай электронных плацяжоў, а папярэджанні і паведамленні могуць адлюстроўвацца на іх у выпадку надзвычайнай сітуацыі або аварыі», - кажуць чыноўнікі.
У ліку іншага на шыльды можна будзе дадаваць знакі, якія паведамляюць іншым удзельнікам дарожнага руху, што за стырном знаходзіцца кіроўца-пачатковец.