З'явіўся новы тып махлярства з карткамі

• 14.03.2018, 16:44

Адмысловыя прылады счытваюць персанальныя звесткі з магнітных палос крэдытак.

Паводле інфармацыі ўправы «К» МУС, новы спосаб падману цяпер актыўна распаўсюджваецца ў краінах Еўропы і ЗША. Але ўжо неўзабаве можа прыйсці і ў Беларусь.

- Ашуканцы ўсталёўваюць адмысловыя накладкі на POS-тэрміналы, якія выкарыстоўваюцца для аплаты тавараў і паслуг. Прылады счытваюць персанальныя звесткі з магнітнай паласы банкаўскай карткі і запамінаюць уведзены кліентам пін-код. Затым вырабляецца дублікат карты, на якую запісваецца выкрадзеная інфармацыя, што дае магчымасць зняць грошы ва ўсякім банкамаце, - папярэджвае міліцыя.

Каб пазбегнуць крадзяжу з банкаўскай карткі, праваахоўнікі раяць беларусам распачаць дадатковыя захады абароны. Напрыклад, замяніць картку з магнітнай паласой на больш сучасную чыпавую картку, лепш абароненую ад падробкі.

Таксама рэкамендуецца ўстанавіць на картку дыферэнцыраваныя ліміты на зняцце гатоўкі, а таксама на набыткі і разлікі ў інтэрнэце.