Колькасць хворых на адзёр у Ваўкавыску вырасла да 12 чалавек

• 10.03.2018, 14:14

Больш за 30 чалавек знаходзяцца пад наглядам медыкаў.

У пятніцу дыягназ быў лабараторна пацверджаны ў 12 жыхароў горада. У бальніцы з клінічнымі праявамі знаходзяцца трое дарослых і тры дзіцяці. Шасцёра цалкам ачунялі. Больш за 30 чалавек пад наглядам медыкаў для выключэння або пацверджання хваробы. Захворванне праходзіць у сярэдняй або лёгкай форме, паведамляе газета «Рэспублiка».

У горадзе адкрыты дадатковы прышчэпачны пункт, які працуе з 8.00 да 20.00. Людзі масава вакцынуюцца, улічваючы, што практычна ўсе хворыя не былі прышчэпленыя ад адру.

- Усяго прышчэплена 1018 «кантактных» жыхароў, - цытуе «Рэспублiка» Алену Грыцкевіч, намесніцу галоўнага лекара ў медыцынскай частцы Ваўкавыскай цэнтральнай раённай бальніцы. - Працягваем вызначаць імаверныя агмені лакалізацыі захворвання. Усе асобы пасля магчымага кантакту з крыніцай інфекцыі вакцынуюцца на працягу 72 гадзін. Участковыя лекары вядуць пакватэрны абход. Яны складаюць спісы дарослых і дзяцей, у якіх няма прышчэпачных карт, а таксама тых, хто мог кантактаваць з хворымі і іх асяроддзем.

Адзёр - гэта аэразольная інфекцыя: каб захварэць, досыць пабыць у адным памяшканні з тым, хто ўжо захварэў. Інкубацыйны перыяд (ад моманту заражэння да з'яўлення сімптомаў) - 10-18 дзён, максімальны - 21 дзень.