Беларус і ўкраінец спрабавалі правезці праз мяжу какаін на $150 тысяч
- 28.02.2018, 21:36
Аўтамабіль з какаінам у паліўным баку быў затрыманы ў пункце пропуску «Ягодзін», на польска-ўкраінскай мяжы.
Украінец у змове з беларусам спрабавалі правезці ў паліўным баку аўто 1,1 кг какаіну. Як паведамляе Дзяржаўная фіскальная служба Украіны, аўтамабіль быў затрыманы ў пункце пропуску «Ягодзін», на польска-ўкраінскай мяжы.
Кантрабанду выявілі мытнікі сумесна з супрацоўнікамі Службы бяспекі Украіны.
На паведамленне ведамства, наркатычны сродак спрабаваў завезці «грамадзянін Украіны ў змове з грамадзянінам Рэспублікі Беларусь». Наркотык быў расфасаваны ў чатыры пластыкавыя бутэлькі, якія былі схаваныя ў паліўным баку аўтамабіля Mitsubishi.
Агульная вага знаходкі складае 1,1 кг, прыблізны кошт - 150 тысяч даляраў.