Прэм'ер Славакіі прапанаваў €1 мільён за інфармацыю пра забойства журналіста

• 28.02.2018, 18:25

Матывам забойства праваахоўнікі ўважаюць прафесійную дзейнасць Яна Кучака.

Прэм'ер-міністр Славакіі Роберт Фіцо прапанаваў 1 млн еўраў за інфармацыю, якая дапаможа ў расследаванні забойства журналіста Яна Кучака.

Пра гэта паведамляе ukrinform.ru cа спасылкай на BBC.

«Прэм'ер-міністр Славакіі Роберт Фіцо прапанаваў узнагароджанне - 1 млн еўраў (1,2 млн даляраў ЗША) таму, хто падасць інфармацыю ў справе аб забойстве журналіста- расследавальніка», - гаворыцца ў паведамленні.

Адзначаецца, што пасля рэзананснага забойства некалькі славацкіх газет надрукавалі апошні артыкул Кучака, у якім ён напісаў пра сувязь паміж італьянскай мафіяй і палітычнай карупцыяй на высокім узроўні.

Са слоў брытанскага калегі, у публікацыі забітага журналіста гаворка ідзе пра фіктыўныя выплаты з фондаў ЕЗ грамадзянам Славакіі і Італіі, якія, магчыма, датычныя да італьянскай арганізаванай злачыннай групоўкі з Калабрыі - «Ндрангета».

Тым часам у славацкай прэсе не змаўкаюць спекуляцыі вакол матыву злачынства.

Як паведамлялася, 26 лютага стала вядома, што ў Славакіі застрэлілі журналіста- расследавальніка Яна Кучака і ягоную сяброўку. Іх целы знайшлі ў доме ў сяле Велька Мача блізу горада Трнава на захадзе краіны. Паліцыя расследуе справу як падвойнае забойства. Найбольш імаверным матывам забойства праваахоўнікі лічаць прафесійную дзейнасць Кучака.