443 гады таму Стэфан Баторый стаў каралём Рэчы Паспалітай

• 15.12.2018, 17:43

За новым манархам неафіцыйнай сталіцай Рэчы Паспалітай стала Гародня.

Нарадзіўся Стэфан Баторый 27 верасня 1533 года.

15 снежня 1575 года Стэфан Баторый быў абраны каралём Рэчы Паспалітай і Вялікім князем ВКЛ. Ён кіраваў да 12 снежня 1586.

Граматай ад 29 ліпеня 1579 абвясціў, што Каралеўства Польскае і Вялікае княства Літоўскае з'яўляюцца раўнапраўнымі дзяржавамі ў складзе федэратыўнай дзяржавы, таксама абавязаўся захоўваць самастойнасць ВКЛ, пашыраць яго межы, не прызначаць літоўскімі ваяводамі палякаў, агульныя соймы склікаць па чарзе, то ў Вялікім княстве, то ў Кароне.

Прывілеяй ад 1 красавіка 1579 ператварыў Віленскі езуіцкі калегіум у акадэмію. Таксама выдаў дазвол на адкрыццё езуіцкага калегіума ў Полацку (1581), Рызе (1580) і Дорпаце (1584). Яму належыць ініцыятыва адкрыцця езуіцкага калегіума ў Гародні.

Імкнуўся да мірнага развязвання ідэалагічных канфліктаў.

Сваю рэзідэнцыю Стэфан Баторый трымаў у Гародні, у Старым замку. Тут ён прымаў пасольства маскоўскае (1581), ангельскае (1584), правёў раду сенатараў для разгляду дамаганняў Швэцыі (1582). Гараджанам надаў пэўныя льготы, выдаў прывілей для саборнай Прачысценскай царквы. За ім у Гародні праходзіў кожны трэці сейм.

Як кароль Польшчы, пайшоў на значныя саступкі шляхце, падтрымліваў езуітаў. Замест каралеўскага суда як вышэйшай судовай інстанцыі зацвердзіў шляхецкія выбарныя трыбуналы.