У Нямеччыне праз страйк спыніліся амаль усе цягнікі

• 10.12.2018, 12:59

Чыгуначнікі патрабуюць падвышэння заробку.

У Нямеччыне ў панядзелак раніцай сур'ёзна парушаны графік чыгуначных перавозак праз страйк чыгуначнікаў, якія патрабуюць падвышэння заробку.

Пра гэта паведамляе AFP (пераклад - eurointegration.com.ua).

Міжрэгіянальныя перавозкі былі скасаваныя ва ўсёй краіне праз чатырохгадзінны страйк, які пачаўся а5:00 раніцы, паведаміў нямецкі аператар чыгункі Deutsche Bahn.

У многіх буйных гарадах такіх як Бэрлін, Франкфурт, Мюнхен ды іншых сталіцах федэральных зямель мясцовы трафік амаль цалкам спыніўся.

Страйк закрануў хуткасныя цягнікі (ICE), а таксама міжгароднія злучэнні. Перабоі закранулі і рэгіянальныя службы. У федэральнай зямлі Баварыя былі прыпыненыя ўсе чыгуначныя перавозкі.

Перамовы пра заробкі паміж Deutsche Bahn і прафзвязам чыгуначнікаў EVG, якія патрабуюць падвышэння заробку на 160% для 160 тысяч супрацоўнікаў, у суботу закончыліся без якіх-небудзь дамоўленасцяў.

"Працадаўца зрабіў прапановы, якія не адпавядалі нашым патрабаванням", - сказала перамоўніца EVG Рэгіна Руш-Зімба.

Deutsche Bahn у сваёй заяве назваў страйк "абсалютна бескарысным", заявіўшы, што прапановы кампаніі былі "прывабнымі і адпавядалі асноўным патрабаванням" працаўнікоў.

У панядзелак удзень павінен адбыцца новы раўнд перамоў паміж сторанамі.