Чаму ў Берасці не могуць знайсці кіроўцу на заробак паўтары тысячы
- 19.11.2018, 9:53
Берасцейская вобласць стала лакмусавай паперкай для эканомікі краіны.
Эканаміст Сяргей Чалы распавёў пра эканамічныя асаблівасцях Берасцейскай вобласці, піша «Салідарнасць».
Апісаная ім сітуацыя выглядае досыць песімістычна.
Са слоў эканаміста, праблемы Берасця і вобласці характэрныя агулам для краіны:
- Берасцейская вобласць, як лакмусавая паперка для ўсёй краіны. Яна, мабыць, першай адчувае тыя праблемы, з якімі мы неўзабаве сутыкнёмся на ўзроўні ўсёй макраэканомікі.
Разрыў у даходах нікуды не знік
У выніку крызісу апошніх гадоў разрыў у развіцці паміж рэгіёнамі працягвае павялічвацца. І калі ў ранейшыя гады з аднаўленнем росту эканомікі наступствы расслаення ўдавалася нівеліраваць, то гэтым разам паляпшэнне эканамічнай сітуацыі не развяжа праблему, адзначыў экспэрт.
Год таму ўлады зразумелі, што маюць справу з пераходам праблемы ў новую якасць, а не кан'юнктурным момантам, і што з гэтым трэба нешта рабіць.
Пра дэпапуляцыю цэлых рэгіёнаў гавораць ужо афіцыйна
Бізнэс актыўнасць стала канцэнтравацца вакол гарадоў. Гэта стала асабліва прыкметна пасля ўвядзення льгот для бізнэсу ў малых гарадах і сельскай мясцовасці. У выніку гэта прыводзіць да дэпапуляцыі цэлых рэгіёнаў. І гэты факт прызналі ужо і на афіцыйным узроўні.
Эканаміст адзначыў, што вызваленне вялікай колькасці рабочых рук у выніку чарговага эканамічнага спаду працягваецца. Адток рабочай сілы прыводзіць да таго, што інвестары не могуць адкрываць у рэгіёнах новыя вытворчасці праз дэфіцыт кваліфікаваных працаўнікоў.
Раней параўноўвалі з Польшчай, цяпер - з Украінай
На адток з рэгіёнаў кваліфікаванай рабочай сілы ўплывае і працоўная міграцыя за межы краіны. Сяргей Чалы падкрэсліў, што навіной у гэтым пытанні з'яўляецца скарачэнне ролі Расеі на рынку працы на карысць Польшчы. Акрамя таго, паступова расце плынь працоўных мігрантаў з Беларусі ва Украіну, што для нас, на думку экспэрта, з'яўляецца непрыемным фактам:
- Раней Лукашэнка любіў параўноўваць эканамічную сітуацыю ў краіне з суседзямі. Спачатку была Польшча, у якой «інфляцыя высокая і шахцёры страйкуюць». Потым палякі сышлі далёка наперад і з'явіліся балтыйскія краіны. З Расеяй параўноўваць сябе было глупствам і ў выніку засталася краіна, у якой ідуць баявыя дзеянні.
За апошнія два гады Берасцейская вобласць прыкметна прасела
Эканаміст распавёў аб выніках вывучэння рэйтынгу канкурэнтаздольнасці рэгіёнаў, які супольна складаюць Інстытут эканомікі пры Мінэканомікі і ІПМ:
- Феноменам Берасцейскай вобласці з'яўляецца тое, што два гады таму яна займала другое ці трэцяе месца паводле ўсіх паказчыкаў эканамічнай актыўнасці і прывабнасці. А цяпер, асабліва за апошні год, рэгіён страціў вельмі шмат пазіцый.
Экспэрт падаў некалькі прыкладаў. Так, наяўнасць на рынку вытворчасці харчовых тавараў буйнога і дамінантнага гульца ў асобе «Савушкінага прадукту» моцна ўскладняе жыццё фермерам і малым прадпрыемствам.
Акрамя таго, праблемным для вобласці стала якасць падрыхтоўкі спецыялістаў:
- Нідзе няма такой незадаволенасці якасцю падрыхтоўкі студэнтаў.
Берасцейшчына страчвае сваю прывабнасць на фоне Менска і Менскай вобласці з іх тэхнапаркам і «Вялікім каменем», адзначыў Чалы.
Пра беспрацоўе ў рэгіёне
- Цікавы феномен: афіцыйнае беспрацоўе вельмі маленькае. Пры гэтым на берасцейскім рынку працы назіраецца вялізнае перавышэнне прапаноў вакансій над колькасцю шукальнікаў. У асобных пазіцыях да сотняў раз даходзіць. Напрыклад, медработнікаў - у 95 разоў. У транспартнай сферы, якая вельмі важная для памежнага рэгіёну, вакансій у восем разоў больш. Анекдатычны выпадак, пра які распавядаюць самі ўлады: на 1500 рублёў не могуць знайсці кіроўцу. Таму што ўсе яны ўжо працуюць у нейкім іншым месцы.