На сталовую для ўдзельнікаў Еўрапейскіх гульняў выдаткуюць $2,8 мільёна

• 18.11.2018, 19:25

Пасля заканчэння Гульняў сталовую дэмантуюць.

Сталовая, дзе будуць харчавацца ўдзельнікі II Еўрапейскіх гульняў, каштавацьме прыкладна $2,8 млн. Гэта вынікае з тэндэрнай дакументацыі, якую даследавала "Народная воля".

Напрыклад, за будаўніцтва павільёна пад сталовую ўлады гатовыя заплаціць 5 576 672 беларускіх рубля, а яшчэ 270 тысяч рублёў дзяржава гатовая заплаціць за распрацоўку праекта павільёна. Тэндэр на распрацоўку прызналі несапраўдным і ў выніку выкарыстоўвалі працэдуру закупкі з адной крыніцы, што звычайна вядзе да падаражання.

Павільён пабудуюць на тэрыторыі студэнцкай вёскі БДУ, а пасля заканчэння Гульняў яго дэмантуюць цягам трох месяцаў. Гэты аб'ект павінен фінансавацца са сродкаў бюджэту Менска.

Сёлета на арганізацыю гульняў з рэспубліканскага бюджэту (рэзервовага фонду дыктатара) выдалі 76,9 мільёна беларускіх рублёў. За гэтыя грошы актыўна закуплялі спартовы інвентар, пасцельную бялізну і мэблю, якой будуць карыстацца ўдзельнікі-спартоўцы.