Агнешка Радваньска абвясціла пра заканчэнне кар'еры

• 15.11.2018, 11:27

Былая другая ракетка свету сышла з тэніса ў 29 гадоў.

Былая другая ракетка свету Агнешка Радваньска закончыла кар'еру ва ўзросце 29 гадоў, паведамляе tut.by.

- Хачу падзяліцца з вамі адной з самых важных пастаноў у маім жыцці. Сёння, пасля 13 гадоў у прафесійным тэнісе, я наважыла скончыць кар'еру. Гэта было нялёгка. Я рада, што ў мяне так шмат важных успамінаў, у тым ліку 20 тытулаў турніраў WTA, чэмпіянат WTA ў Сінгапуры, фінал Уімблдона і многія іншыя.

На жаль, я ўжо не магу трэніравацца і гуляць так, як звыкла. Апошнім часам арганізм не апраўдвае мае чаканні. Улічваючы стан здароўя і цяжкія нагрузкі прафесійнага тэніса, я павінна прызнаць, што не магу вывесці арганізм на патрэбны ўзровень, - падае словы Агнешкі Радваньскай афіцыйны сайт WTA.

За сваю 13-гадовую кар'еру Агнешка Радваньска здабыла 20 тытулаў WTA, уключаючы выніковы турнір (2015). Была другой ракеткай свету ў 2012 і 2016 гадах. У 2012 годзе яна гуляла ў фінале Уімблдона, стаўшы першай польскай тэнісісткай, якая дайшла да фіналу турніру Вялікага шалома ў адкрытай эры. Да яе польскія тэнісісткі не перамагалі і ў фіналах турніраў WTA.

Малодшая сястра Агнешкі, 27-гадовая Уршуля Радваньска, таксама прафесійная тэнісістка.