Кабякову знайшлі «цёплае мястэчка» ў «Белгазпрамбанку»
- 15.10.2018, 16:34
Найбліжэйшым часам павінна скончыцца тэхнічная працэдура зацвярджэння экс-прэм'ера.
Былы прэм'ер-міністр Беларусі Андрэй Кабякоў увойдзе ў склад рады дырэктараў ААТ «Белгазпрамбанк» у статусе незалежнага дырэктара, паведаміла агенцтву «Інтэрфакс-Захад» крыніца ў банкаўскіх колах.
«Найбліжэйшым часам павінна скончыцца тэхнічная працэдура зацвярджэння Андрэя Кабякова ў якасці незалежнага дырэктара ў складзе рады дырэктараў Белгазпрамбанка», - сказала крыніца.
Як паведамлялася, А.Кабякоў разам з большай часткай складу ўрада быў адпраўлены ў адстаўку 18 жніўня гэтага года на пастанову Лукашэнкі.
У пачатку кастрычніка А.Кабякоў прайшоў ацэнку адпаведнасці кваліфікацыйным патрабаванням і патрабаванням да дзелавой рэпутацыі адмысловай камісіі Нацбанку.
Раней пасаду аднаго з незалежных дырэктараў у складзе рады дырэктараў «Белгазпрамбанка» займаў цяперашні прэм'ер-міністр Сяргей Румас да свайго прызначэння на пасаду кіраўніка ўрада.
«Белгазпрамбанк» створаны ў 1990 годзе, яго акцыянерамі з'яўляюцца ПАТ «Газпрам» (49,66%), Газпрамбанк (49,66%), ААТ «Газпрам трансгаз Беларусь» (0,49%) і міністэрства энэргетыкі Беларусі (0,18%).
Раду дырэктараў банка ўзначальвае намеснік старшыні праўлення ПАТ «Газпрам» Андрэй Круглоў.