«Дармаедаў» будуць шукаць праз ID-карткі
- 5.01.2018, 12:30
«Дэпутатка» распавяла пра некаторыя нюансы абноўленага дэкрэта №3.
Незанятым беларусам працаздольнага ўзросту давядзецца аплачваць паслугі, якія субсідуюцца з бюджэту, стоадсоткавай сумай, распавяла выданню «Звязда» старшыня сталай камісіі працы і сацыяльных пытанняў «палаты прадстаўнікоў» Тамара Красоўская, апавядаючы аб прапановах, якія ўвойдуць у новую рэдакцыю дэкрэта №3. Дакладны пералік такіх паслуг будзе распрацаваны ўрадам у першым квартале 2018 года.
Са слоў Тамары Красоўскай, у гэтым спісе, могуць, апынуцца паслугі за газа- і электразабеспячэнне. Пры гэтым беларусы, якія не маюць працы, але знаходзяцца ў цяжкай жыццёвай сітуацыі, будуць вызваленыя ад такой платы.
- Мы заўважылі, што наймальнікі не вельмі ахвотна хочуць браць выпускнікоў ВНУ і каледжаў без досведу, а таксама жанчын, якія толькі выйшлі з адпачынку догляду дзіцяці. Для таго каб знайсці працоўнае месца для кожнага, у раёнах павінны быць створаны спецыяльныя камісіі. У іх увойдуць дэпутаты ўсіх узроўняў, прадстаўнікі ЖКГ, упраў унутраных спраў, аддзелаў адукацыі і занятасці.
Тамара Красоўская дадала, што нельга ўсе рэгіёны параўноўваць з Менскам, дзе база вакансій налічвае тысячы прапаноў. Павінны быць вызначаныя тэрыторыі з напружанай сітуацыяй на рынку. Іх пералік неабходна сцвярджаць штогод. Выхад для такіх рэгіёнаў - адкрыццё новых працоўных месцаў, перападрыхтоўка спецыялістаў і стымуляванне самазанятасці. Ствараць таксама адзіную інфармацыйную базу грамадзян, якія не занятыя ў эканоміцы.
- Важна, каб дзяржаўныя органы ўзаемадзейнічалі пры яе вядзенні, - мяркуе старшыня камісіі. - Інфармацыя ў базе павінна абнаўляцца штомесяц - хтосьці пераехаў у іншы рэгіён, хтосьці праходзіць курсы. Вылічыць, ці ёсць праца ў чалавека, можна будзе таксама з дапамогай ID-карты, якую ў наступным годзе плануюць завесці на кожнага грамадзяніна.
Уздзейнічаць на тых, хто працаваць не хоча, складана, панаракала «дэпутатка». «Многія, хто быў уладкаваны камісіяй вясной, ужо звольніліся. Хоць ім і месцы на добрых прадпрыемствах знайшлі, і заробак далі».