Міністэрства фінансаў ЗША патлумачыла пашырэнне санкцый супраць расейскіх кампаній

• 27.01.2018, 14:36

Чорны спіс быў дапоўнены новымі назвамі расейскіх кампаній у сувязі з канфліктам ва Украіне і акупацыяй Крыма.

Міністэрства фінансаў ЗША патлумачыў увядзенне санкцый у дачыненні да кожнай фізічнай асобы, а таксама кожнай расейскай кампаніі. Згодна з апублікаванай на сайце міністэрства заявай, абмежаванні прымаліся «ў сувязі з канфліктам ва Украіне, а таксама акупацыяй Расеяй Крыма», піша РБК.

У спіс, як нагадалі прадстаўнікі ведамства, між іншым трапілі тры чалавекі і дзве арганізацыі, звязаныя з пастаўкамі ў Крым чатырох турбін Siemens (гэта намеснік міністра энэргетыкі Андрэй Чарэзаў, дырэктар дэпартамента аператыўнага кантролю і кіравання ў электраэнэргетыцы Мінэнерга Яўген Грабчак, гендырэктар ТАА «ВА «Тэхнапрамэкспарт» (будуе электрастанцыі ў Крыме і паставіў турбіны) Сяргей Тапор-Гілка, а таксама ТАА «Тэхнапрамэкспарт» і кампанія «Сілавыя машыны», якая з'яўляецца мінарытарным акцыянерам заводу «Сіменс тэхналогіі газавых турбін»- пастаўшчыка чатырох газатурбінных установак, якія трапілі ў Крым).

Увядзенне абмежаванняў у дачыненні да гэтых людзей і кампаній, як заўважылі ў амерыканскім міністэрстве, «з'яўляецца часткай кампаніі Мінфіна ЗША ў падтрымцы ціску на Расею з дапамогай санкцый». Гэтыя абмежаванні, як падкрэслілі ў ведамстве, будуць дзейнічаць датуль, пакуль Масква «не выканае сваіх абавязанняў у рамках менскіх пагадненняў». «Урад ЗША прыхільны захаванню суверэнітэту і тэрытарыяльнай цэласнасці Украіны», - патлумачыў прыняцце адпаведнага рашэння амерыканскі міністр фінансаў Стывен Мнучын. «Тыя, хто дае тавары, паслугі ці матэрыяльную падтрымку для дзейнасці ва Украіне фізічным і юрыдычным асобам, якія знаходзяцца пад санкцыямі Злучаных Штатаў, таксама могуць быць падвергнутыя абмежаванням», - дадаў ён.

Так, санкцыі ў дачыненні да Чэразава і Грабчака, паводле звестак міністэрства, былі прынятыя ў сувязі з тым, што яны курыравалі пастаўку турбін у Крым у якасці «службовых асоб урада Расейскай Федэрацыі». ТАА «Тэхнапрамэкспарт» у амерыканскім ведамстве назвалі «адным з суб'ектаў, адказных за перадачу турбін ў Крым». Абмежаванні супраць гендырэктара гэтага прадпрыемства Вашынгтон увёў праз тое, што Тапор-Гілка «дзейнічаў або выступаў (прама ці ўскосна) ад імя ТАА «Тэхнапрамэкспарт», гаворыцца ў заяве. Санкцыі на «Сілавыя машыны», як патлумачылі ў міністэрстве, у сваю чаргу былі накладзеныя праз тое, што гэта прадпрыемства «аказвала матэрыяльную, фінансавую, тэхнічную ці іншую падтрымку ТАА «Тэхнапрамэкспарт».

Таксама абмежаванні, як адзначаецца ў паведамленні на сайце Мінфіна, былі ўведзены ў дачыненні да трох чалавек і чатырох арганізацый, якія «падтрымалі незаконны гандаль вуглём з так званых Данецкай і Луганскай народных рэспублік». Эксплуатаваць «украінскія прадпрыемствы, у тым ліку вугальныя шахты, якія знаходзяцца пад кантролем кампаніі ЗАТ «Знешгандальсэрвіс», якая супрацоўнічае з ТАА «Газ-Альянс» (ёю кіруе ўкраінскі алігарх Сяргей Курчэнка)», у «ДНР» і «ЛНР», паводле звестак Мінфіна ЗША, пачалі ўвесну 2017 года. Пасля здабыты там вугаль, як адзначылі ў міністэрстве, экспартавалі праз гэтыя прадпрыемствы ў Еўропу.

«Акрамя таго, браты Аляксандр і Сяргей Мельнічукі (першы - намеснік міністра паліва і энэргетыкі ЛНР. - РБК) выкарысталі некалькі кампаній, у тым ліку Doncoaltrade Sp. Z O O і [зарэгістраваную ў Растове-на-Доне] кампанію «Вугальныя тэхналогіі», каб экспартаваць вугаль з «ДНР» і «ЛНР» у Расею і іншыя краіны», - адзначаецца ў паведамленні Мінфіна.

Так, абмежаванні ў дачыненні да ЗАТ «Знешгандальсэрвіс» і яе генеральнага дырэктара Уладзіміра Пашкова, паводле звестак міністэрства, былі ўведзеныя ў сувязі з тым, што гэтае прадпрыемства «дзейнічала ад імя, альбо ж па даручэнні (прама ці ўскосна) уладаў «ДНР» і «ЛНР» (а дырэктар прадпрыемства гэтыя дзеянні «публічна падтрымаў»). ТАА «Газ-Альянс» і ТАА «Вугальныя Тэхналогіі» ў чорным спісе, як растлумачылі ў ведамстве, у сваю чаргу апынуліся праз тое, што «аказвалі матэрыяльную дапамогу альбо фінансавую падтрымку» ЗАТ «Знешгандальсэрвісу», а таксама «ДНР» і «ЛНР».

Акрамя гэтага ў чорны спіс трапілі міністр дзяржаўнай бяспекі «ДНР» Уладзімір Паўленка, а таксама міністр інфармацыі «ДНР» Ігар Анціпаў. Абодва яны, як заўважылі ў Мінфіне ЗША, «дзейнічалі або мелі намер дзейнічаць прама ці ўскосна ў падтрымку або ад імя народнай рэспублікі». «Губернатар» Севастопаля Дзмітрый Аўсяннікаў быў унесены Вашынгтонам ў чорны спіс у сувязі з тым, што «нясе адказнасць ці ж ўдзельнічае (прама ці ўскосна) у дзеяннях або палітыцы, якія пагражаюць міру, бяспецы і стабільнасці, суверэнітэту Украіны», дадалі ў міністэрстве.

Спіс фізічных асоб і кампаній, у дачыненні да якіх былі ўведзеныя абмежаванні быў апублікаваны на сайце Мінфіна 26 студзеня. У МЗС Расеі ў адказ на гэта заявілі, што прычыну, па якой былі прынятыя гэтыя санкцыі, у Маскве лічаць надуманай. «У Вашынгтоне ніяк не могуць пазбавіцца ад ілюзій, што нас можна спалохаць адмовамі ў амерыканскіх візах або гандлёвымі забаронамі, прымусіць адмовіцца ад незалежнага курсу на міжнароднай арэне», - дадалі таксама ў расейскім замежнапалітычным ведамстве.