ЗША паставілі Грузіі супрацьтанкавыя комплексы Javelin

• 23.01.2018, 16:15

У пагадненне ўключаныя дзесяць інструктараў, тэхнічная дапамога ўрада і падрадчыка ЗША.

Міністр абароны Грузіі заявіў, што ЗША даставілі ў краіну супрацьтанкавыя комплексы Javelin.

Пра гэта паведамляе "Еўрапейская праўда" са спасылкай на грузінскі сайт MediaMall.

"Першы этап набыцця сістэмы Javelin скончыўся паспяхова. Сістэма размешчаная ў Грузіі ў бяспечным месцы", - заявіў міністр абароны Грузіі Леван Ізорыя журналістам пасля сустрэчы з амбасадарам ЗША Янам Кэлі.

З ягоных слоў, неўзабаве грузінскія вайскоўцы пройдуць спецыяльны курс вывучэння правілаў выкарыстання сістэмы.

Нагадаем, у лістападзе Дзяржаўны дэпартамент ЗША прыняў пастанову аб зацвярджэнні магчымага продажу Грузіі ракет Javelin і пускавых установак на $75 млн.

Урад Грузіі звярнуўся з запытам аб куплі 410 ракет Javelin і 72 пускавых комплексаў Javelin Command (CLU) (у тым ліку два блокі CLaw Javelin Block 1, якія будуць выкарыстоўвацца ў якасці запасных частак).

Таксама ў пагадненне ўключаныя дзесяць інструктараў, тэхнічная дапамога ўрада і падрадчыка ЗША, транспарт і іншыя звязаныя элементы лагістыкі і праграмы падтрымкі.