Жукоўскі: Суддзя пакараў сябе, сваіх сваякоў, пракурораў і міліцыянтаў
- 22.01.2018, 10:58
Незалежных журналістаў аштрафавалі на $1 тысячу за праўду пра задушлівы пах ад завода ў Светлагорску.
Светлагорскі раённы суд 18 студзеня прысудзіў да вялікіх штрафаў гомельскіх журналістаў-фрылансераў Кастуся Жукоўскага і Андрэя Толчына за нібыта незаконнае апытанне жыхароў вёскі Якімава Слабада, выраб і распаўсюд прадукцыі СМІ без акрэдытацыі для тэлеканала «Белсат», паведамляе гомельская «Вясна».
Жукоўскі аштрафаваны на 50 базавых адзінак (1 225 рублёў), Толчын - на 45 базавых (1 102,5 рубля).
- Суддзя Руслан Царук, які сёння аштрафаваў мяне з Толчыным, пакараў не толькі нас. Ён выбраў сваё жыццё ў шкодным смуродзе, а таксама сваіх сваякоў, пракурораў, міліцыянераў і 70-тысячны горад з прылеглымі да заводу беленай цэлюлозы вёскамі, - мяркуе журналіст Жукоўскі.
Адміністрацыйныя пратаколы на фрылансераў складаў старшы ўчастковы інспектар, капітан міліцыі Сяргей Шліхт. Ён абвінаваціў фрылансераў у парушэнні Закона аб СМІ. Паводле інфармацыі міліцыі, фрылансеры злоўжывалі правамі і абавязкамі журналіста, бо вялі апытанне жыхароў вёскі Якімава Слабада і такім чынам ўдзельнічалі ў вырабе і распаўсюдзе прадукцыі СМІ ў выглядзе сюжэту, які быў размешчаны ў СМІ.
У мінулым снежні фрылансеры запісалі на відэа выказванні жыхароў вёскі Якімава Слабада наконт задушлівага смуроду, які ахінуў наваколлі, пасля пабудаванага надоечы кітайцамі і на кітайскі крэдыт завода беленай сульфатнай цэлюлозы. Відэа было размешчанае на YouTube - частку здымкаў выкарыстаў спадарожнікавы тэлеканал «Белсат».
У суд падтрымаць Жукоўскага і Толчына прыехалі з горада і вёскі Якімава Слабада дзясяткі жыхароў.
- Усе дзівіліся, як гэта можна судзіць журналістаў за праўду, - кажа Андрэй Толчын.