«Яміна па шчыкалатку! За што я грошы плачу?»
- 6.09.2017, 9:28
Крык душы вілейскай аўтааматаркі.
У рэдакцыю kraj.by звярнулася жыхарка Вілейкі Святлана. Аўтааматарку са стажам больш за 10 гадоў абурыў стан праезнай часткі, якая вядзе да станцыі тэхагляду.
Відэа, дзе чытачка дэманструе яміны на дарозе, яна выклала на YouTube. Каб іх аб'ехаць, кіроўцам даводзіцца ўжываць навыкі фігурнага кіравання і выязджаць на сустрэчную паласу, кажа яна.
«Праз дрэнную дарогу лямпачкі ў фарах страсае так, што на тэхагляд адпраўляюць паўторна»
Праз дрэннае асфальтавае пакрыццё, са слоў Святланы, праходзіць працэдуру ТА сёлета ёй давялося двойчы.
- Гэтай дарогай я езджу блізу года, бо адначасна падводжу на працу суседку. Асфальт усё такі ж. Часам ЖКГ каля сябе засынае ямы, але яны вельмі хутка з'яўляюцца зноў. За дарогі я плачу падатак 184 рублі. Незразумела, за што я плачу? - дзівіцца жанчына. - Уся дарога цалкам у ямінах па шчыкалатку. Падвеска забіваецца ў момант, а лямпачкі ў фарах страсае так, што ТА адпраўляюць другім разам праходзіць.
Жыхарка Вілейкі адзначае, што якасцю дарожнага пакрыцця незадаволеная не толькі яна.
- Многія мае сябры працуюць у арганізацыях, побач з якімі праходзіць гэтая дарога, і ўсе абураюцца. Яны былі толькі «за», каб зняць відэа і адправіць яго куды-небудзь, каб захады ўжылі. Дзівіць, што ў нас свой асфальтавы завод, але грошай на ўсе дарогі, каб іх адрамантаваць, няма або не запланавана.
Вілейскае ЖКГ: «Гэта вытворчы праезд. ЖКГ абслугоўвае толькі вуліцы Вілейкі і Вілейскага раёна»
У адказе на афіцыйны запыт партала Вілейскае ЖКГ патлумачыла, што адцінак дарогі ад вуліцы 1 траўня тэрыторый ДУП «ПМК-185» з'яўляецца вытворчым праездам да наступных прадпрыемстваў: ГУП «Вілейскае ЖКГ», «Аўтобусны парк №5», Вілейскі РГС філіяла ПУ «Маладзечнагаз», ДУП «ПМК-185».
ЖКГ абслугоўвае толькі вуліцы Вілейкі і Вілейскага раёна. Утрымліваць і абслугоўваць вытворчыя праезды, аб адным з якіх казала наша чытачка, павінны прадпрыемствы, да якіх яны вядуць.
У Вілейскім ЖКГ таксама адзначылі, што «ліквідацыя ямачнасці на адрэзку ад вуліцы 1 траўня да вытворчай базы ЖКГ ажыццяўляецца ўласнымі сіламі пры неабходнасці, што і было выкананае ў 2017 годзе».
Акрамя таго, як паведамляецца ў афіцыйным адказе, «размешчаныя за тэрыторыяй Вілейскага ЖКГ прадпрыемствы не бяруць удзелу для ўтрымання асфальтабетоннага палатна вытворчага праезду ў добрым стане ў мэтах бяспекі дарожнага руху, хоць у Вілейцы існуюць службы, якія ажыццяўляюць рамонтныя работы дарог на дамоўнай аснове».