Менскія студэнты апавялі пра тое, як харчавацца на стыпендыю

• 25.09.2017, 11:52

Навучэнцы менскіх ВНУ ведаюць рэцэпты трох страваў з пельменяў.

Студэнцкае жыццё – гэта максімум свабоды і весялосці, але мінімум фінансаў, а значыць, і мноства лайфхакаў пра эканомію. Студэнты менскіх ВНУ распавялі нам, як харчавацца выгодна і не выдаткоўваць на ежу занадта шмат, піша citydog.by.

– Думаю, што студэнты са сваёй вечнай нястачай грошай выжываюць толькі таму, што падыходзяць да пытанняў харчавання максімальна нестандартна. Будзем адкрытыя, паесці смачна можна толькі ў некалькіх выпадках: у першыя дні пасля налічэння стыпухі, дзякуючы нейкай грашовай дапамозе ад бацькоў або пасля таго, калі з'ездзіў дадому і прывёз ежу – у астатні час даводзіцца круціцца. Дарэчы, адмаўляцца ад мамчыных закатак і бульбы не варта ніколі – лішнім сапраўды не будзе. А расол яшчэ і з пахмелля добра.

У перыяд, калі грошы яшчэ ёсць, трэба ісці ў краму і максімальна закупляцца базавымі прадуктамі, таму што потым, як правіла, большая частка фінансаў сыходзіць на тусоўкі, і рэшту месяца даводзіцца проста трываць на апошнім. Базавыя прадукты – гэта макароны, грэчка і рыс, тры кіты, на якіх трымаецца ўся студэнцкая ежа. Камбінуеш гэта з мясам і каўбасамі на зніжцы, і выходзіць выдатна.

Важна лавіць усе акцыі: самая шчодрая на іх, ды і ў прынцыпе, самая танная крама – «Еўраопт», гэта праверана. Заходзіш у яго і зграбаеш усё з «чырвоным коштам». Звычайна там тавары з блізкім заканчэннем тэрміну прыдатнасці, але, паколькі ў студэнтаў ежа і так доўга не ляжыць, – гэта не праблема.

Галоўныя лайфхакі – есці тое, што каларыйна і чым хутка наядаешся. Дома ўсё абавязкова з хлебам: мучное – рэальная тэма, калі ўсё зусім дрэнна – можна проста есці бутэрброды з маянэзам.

Яшчэ выдатная тэма – McDonalds і KFC. Так, шкодна, але затое наядаешся да адвалу за зусім невялікія грошы. З грамадскага харчавання, вядома, нельга забывацца і пра сталоўкі. У нас у БДУ яны даволі дарагія, таму рада: хадзіце ў сталоўкі іншых ВНУ, асабліва ў БНТУ. Там можна нядрэнна паесці ўсяго за паўтара рубля – ідэальнае для студэнта месца.

– Калі шчыра, выжыць на стыпендыю з нашымі запытамі нерэальна: нават з заробкамі і дапамогай бацькоў у выніку ўсё адно хапае толькі на мінімум.

Стандартны рацыён: крупы, яйкі, малако, сала і хатнія агуркі. У маім распараджэнні ёсць тостарніца, таму часта набываем шмат хлеба і робім біч-бутар з маянэзам і сасіскай. Дарэчы, сасіскі бярэм не даражэйшыя за 3,50 руб. за кілаграм – гэта правіла. А грудку найлепш браць у «Рублёўскім», яна там цяпер за 4,50 руб. Яшчэ адзін з самых даступных варыянтаў – гэта пельмені. Іх можна і варыць, і смажыць: лічыце, ужо 2 віды страваў. А беручы пад увагу тое, што вараныя можна есці з юшкай і без юшкі – цэлыя тры.

Даводзіцца пільна сачыць за акцыямі ў крамах і набываць усё на зніжках: атрымліваецца рэальная эканомія. А яшчэ крутая штука – сайты са зніжкамі. Там можна вылучыць выгодныя купоны на піцу, сушы і трохі пашыкаваць.

У кавярнях асабліва не паясі: нават у нашай сталоўцы адзін абед абыдзецца прыкладна ў 4 руб. Гэта значыць, калі абедаць кожны дзень – 120 руб. за месяц, а гэта ўжо значна больш за маю стыпуху. Таму пік нашай марнатраўнасці заключаецца ў набыцці шавухі: ездзім па яе з сябрамі пару разоў на тыдні, наядаемся да адвалу. А яшчэ, калі ёсць магчымасць, ходзім на розныя бясплатныя мерапрыемствы, дзе можна паесці. Увогуле, круцімся, як можам.

– Грошай на ежу я не выдаткоўваю практычна зусім: мая тактыка – прывозіць з дому замарозкі і гатаваць сабе паўнавартасную ежу. У выніку даводзіцца дакупляць няшмат: смятану, яйкі, што-небудзь да гарбаты і іншых прадуктаў дробязь.

У інтэрнаце ў дадатак да мамчыных зарыхтовак гатую ў асноўным бульбу і крупы. Ва ўніверы заўсёды ем у сталоўцы. Калі нехта яшчэ не ў курсе, абедаць у БНТУшнай сталоўцы – самы бюджэтны варыянт для студэнта, вось праўда.

На працы я іду ў супермаркет побач і заўсёды набываю стандартны набор: банан, ёгурт і шакаладны круасан – разам за ўсё 2 рублі. Альбо бяру ссабойку, але гэта, хутчэй, выключэнне, чым правіла.

Часта звяртаю ўвагу на білборды і рэкламу: студэнтам у многіх установах робяць зніжкі на піцу, сушы, напоі і іншае. А яшчэ надзвычайны спосаб зэканоміць на ежы, калі ты дзяўчына, – завесці хлопца, які будзе вадзіць цябе па кавярнях і карміць. Гэта сапраўды працуе.

– У экстрэмальных варунках на адну стыпуху выжыць цяжка, але паспрабаваць можна. У гэтым дапамагае неацэнная дапамога ў выглядзе бульбы, морквы і цыбулі, якая паступае ад бацькоў з хаты. Плюс да гэтага адтуль можна ўзяць парачку закатак, замест таго каб набываць іх у краме, ды яшчэ і паводле непрывабнага кошту.

Харчавацца ў кавярнях кожны дзень – занадта для простага студэнта, і зусім не варыянт. Зрэшты, як і «дашыракі». А вось замарожаныя паўфабрыкаты і час эканомяць, і па кішэні не б'юць. У выніку, нядрэнны рацыён можна сфармаваць з макаронаў, крупаў тыпу рысу ці грэчкі і курыцы. Гэта, вядома, не дэлікатэсы, але цалкам сабе пажыўныя прадукты. Да таго ж і захоўваюцца добра, і хапае надоўга.

Закупляюся я ў супермаркетах, там выбар прадуктаў вялікі, да таго ж бываюць розныя зніжкі, акцыі, «чырвоныя кошты». Хоць увогуле за распродажамі я не асабліва сачу: калі патрэбныя прадукты, то закупляюся адзін раз і па-буйному. У маёй лядоўцы амаль заўсёды можна знайсці сыр, яйкі, сасіскі і малако. У крамах гэтыя прадукты каштуюць не так ужо і дорага, да таго ж з іх ужо можна прыгатаваць як мінімум страваў пяць.

Нядрэнна кормяць у студэнцкай сталоўцы: гэта вам не рэстаран, але і галодным не застанешся. Кошты там ніштаватыя, якраз для стыпендыі. Наконт фастфуду існуе меркаванне, што гэта танна і хітра, але не. Пару разоў са стыпендыяй у кішэні забяжым у «мак» – і грошай як і не было.

А ўвогуле рэдка бывае такое, што ежы зусім няма. Нават не памятаю, калі такое апошні раз было: заўсёды можна дастаць нешта з запасаў.