У Беларусі адзначылі Дзень адзінства балтаў
- 24.09.2017, 10:23
Свята адзначалі больш чым у 20 месцах.
Традыцыйна падчас святкавання Дня адзінства балтаў запальваюць вогнішчы. Сёлета такое свята адзначылі ў больш чым 20 месцах. Адно з вогнішчаў каля старажытнага гарадзішча пад Менскам наведаў фатограф «Радыё Свабода».
Для кагосьці гэта стане зусім адкрыццём, але вогнішчы запальвалі таксама і на ўсходзе - каля Цверы, пад Масквой, на Смаленшчыне і пад Варонежам. А таксама ва ўкраінскім Жытоміры і ў польскім Беластоку. Вось такім калісьці быў арэал, дзе гаварылі на балцкіх мовах.
Дзень адзінства балтаў прызнаны дзяржаўным святам у Літве і Латвіі. Яго гістарычная падстава - бітва пры Саўле, калі сумесныя сілы балцкіх плямёнаў разбілі войска Ордэна мечаносцаў у 1236 годзе.
Свята адзначаецца ў дзень восеньскага раўнадзенства. У народнай традыцыі гэты час падвядзення вынікаў і падліку таго, што зроблена за актыўны летні перыяд. З гэтым звязана і традыцыя запальвання вогнішча.