Прыватная выведка ЗША: Крэмль атрымаў трывожны сігнал

• 12.09.2017, 19:35

У Расеі з'явілася новая сіла.

У нядзелю, 10 верасня, у Расеі прайшлі выбары губернатараў і дэпутатаў у заканадаўчыя органы суб'ектаў краіны. Выбары сталі важным індыкатарам падтрымкі Крамля пасля масавых пратэстаў супраць расейскай улады ў чэрвені гэтага года. З эканамічным застоем, аслабленым палітычным апаратам і зменай пакаленняў Масква губляе палітычную хватку. І вынікі муніцыпальных выбараў можна ўспрымаць як трывожны сігнал для Крамля. Пра гэта гаворыцца ў справаздачы прыватнай амерыканскай разведвальна-аналітычнай кампаніі Stratfor, якая ёсць у распараджэнні «Апострофа».

З набліжэннем рэгіянальных выбараў Крэмль сутыкнуўся з сур'ёзнымі праблемамі ў многіх выбарчых гонках - асабліва ў некалькіх губернатарскіх - з боку аб'яднаных апазіцыйных груп і палітыкаў. Крэмль надаў шмат увагі гэтым выбарам, блакуючы апанентаў подкупам, запалохваннем і выкарыстаннем спрэчнага механізму - «муніцыпальнага фільтра», які патрабуе ад кандыдата заручыцца подпісамі ад 5 да 10% мясцовых дэпутатаў, каб удзельнічаць у выбарах. Антыапазіцыйная кампанія аказалася паспяховай для Крамля, і на выбарах кіраўнікоў суб'ектаў РФ дамінавалі «Адзіная Расея» і яе прыхільнікі.

Наадварот, непрыемнымі для Крамля аказаліся вынікі муніцыпальных выбараў. Апазіцыя і незалежныя кандыдаты дабіліся перамог у многіх гарадах Расеі. Самым яркім поспехам сталі муніцыпальныя выбары ў Маскве, дзе апазіцыйныя кандыдаты атрымалі большасць у 14 раёнах, у тым ліку ў Гагарынскім, дзе галасаваў сам прэзідэнт Расеі Уладзімір Пуцін, і Цвярскім - прэстыжным цэнтральным раёне, дзе размешчаны Крэмль. У цэлым у Маскве апазіцыйныя або незалежныя кандыдаты здабылі 23% месцаў - беспрэцэдэнтны максімум.

Прэс-сакратар прэзідэнта РФ Дзмітрый Пяскоў заявіў, што Крэмль вітае кандыдатаў, якія прадстаўляюць не «Адзіную Расею». І адзначыў, што выбары сталі сведчаннем плюралізму і сумленнага галасавання. Зрэшты, паведамленні аб маніпуляцыях з выбаршчыкамі па-ранейшаму не былі рэдкасцю. Адзін з паслугачоў Крамля быў засняты на камеру, калі раздаваў старшыням выбаркамаў канверты з «узнагародай», і пасля быў звольнены мэрам Масквы Сяргеем Сабяніным. Але, незалежна ад таго, наколькі справядлівымі былі выбары, іх вынікі сведчаць пра тое, што адкрытыя фальсіфікацыі галасавання становяцца ўсё больш складанымі для Крамля.

Прагрэс «Аб'яднаных дэмакратаў» у дасягненні адзінства з'яўляецца, бадай, самым значным вынікам выбараў. У кааліцыю «Аб'яднаных дэмакратаў», што кіруецца партыяй «Яблык», увайшлі ліберальна-дэмакратычныя сілы і шмат дасведчаных палітыкаў, якія супрацьстаялі Пуціну ў раннія гады яго кіравання, але раней сварыліся паміж сабой праз дробязі.

Крэмль апошнім часам непакоіўся праз зноў узмацнелую Камуністычную партыю і рост папулярнасці «суперцяжкага» апазіцыянера Аляксея Навальнага, але цяпер ён таксама павінен хвалявацца наконт «Аб'яднаных дэмакратаў». Здольнасць гэтых ліберальных палітыкаў да супрацоўніцтва і каардынацыі дзеянняў у той меры, каб забяспечыць сабе перамогу, з'яўляецца трывожным сігналам для Крамля, які ўсяляк імкнуўся перашкаджаць аб'яднанню апазіцыйных груп у адзіную сілу.

Поспехі на муніцыпальных выбарах, хоць і здаюцца нязначным дасягненнем, прадказваюць больш буйныя перамогі. Па меры таго, як усё больш некрамлёўскіх прадстаўнікоў уваходзяць у рэгіянальныя і муніцыпальныя заканадаўчыя органы, кандыдатам ад апазіцыі будзе лягчэй забяспечыць подпісы, неабходныя для пераадолення «муніцыпальнага фільтра».

Перамогі апазіцыі з'яўляюцца трывожным сігналам для Крамля, які ўступае ў рашаючую фазу выбараў 2018 года, падчас якіх прэзідэнт Уладзімір Пуцін будзе прэтэндаваць на чацвёртае перавыбранне. Пуцін амаль упэўнены ў ашаламляльнай перамогі, але здольнасць улады ўтрымаць іншыя мандаты - пад пытаннем. І, паколькі на першы план выходзіць мэрыя Масквы, паплечнік Пуціна Сабянін сутыкнецца з выклікамі, што зыходзіць і ад больш узмацнелых прадстаўнікоў апазіцыі - як правых, так і левых.