Наступствы ўрагану «Ірма»: Фота да і пасля
- 12.09.2017, 17:17
Моц стыхіі адчулі на сабе блізу 1,2 мільёна чалавек.
Самы моцны ўраган у Атлантычным акіяне за апошнія 10 гадоў стаў прычынай значных разбурэнняў на Карыбскіх астравах. Ад яго ўздзеяння пацярпелі блізу 1,2 млн чалавек.
«Ірму» цяпер класіфікуюць як трапічны шторм, але яшчэ некалькі дзён таму ўраган належаў да пятай катэгорыі, а хуткасць ветру дасягала 295 км/гадзіну. Паводле папярэдніх звестак, там загінулі, прынамсі, 37 чалавек, піша bbc.com.
Ураган затым прайшоўся па тэрыторыі ЗША, у выніку чаго там загінулі прыблізна 10 чалавек.
Тартола
Прынамсі пяць чалавек загінулі на выспе Тартола, якая з'яўляецца часткай Брытанскіх Віргінскіх выспаў.
У суботу туды прыбыў транспартны самалёт з некалькімі дзясяткамі брытанскіх вайскоўцаў, якія дапамогуць у аднаўленні інфраструктуры выспы.
Аэрапорт моцна пацярпеў, але менавіта зала прыбыццяў цяпер выкарыстоўваецца ў якасці цэнтра кіраўніцтва аднаўленчымі аперацыямі.
Прэм'ер-міністр астраўной дзяржавы Антыгуа і Барбуда Гастон Браўн заявіў, што востраў Барбуда непрыдатны для жыцця пасля ўрагану «Ірма».
Большая частка насельніцтва выспы - ледзь больш за 1600 чалавек - пражывае ў горадзе Кадрынгтоне, дзе, як паказваюць здымкі са спадарожніка, найбольшая колькасць разбурэнняў.
Некаторыя будынкі былі цалкам знішчаныя, і паўсюль на вуліцах ляжаць раскіданыя ветрам абломкі дамоў і канструкцый.