Вячаслаў Піліпук: Будзем стукаць ва ўсе дзверы, каб абараніць беларускіх ІП ад чужынцаў
- 12.09.2017, 15:09
Умовы для работы павінны быць роўнымі для ўсіх.
Намеснік старшыні РГА «Перспектыва» Вячаслаў Піліпук распавядае «Радыё Рацыі», ці выраўняліся ўмовы працы для беларускіх і азіяцкіх прадпрымальнікаў.
У званы беларускія прадпрымальнікі пачалі біць не сёння. Яны распавядалі, што ў Менску і рэгіёнах масава сталі з'яўляцца тавары на кірмашах ад азіяцкіх гандляроў, пераважна грамадзян Кыргызстана. Пры гэтым у апошніх нярэдка наогул адсутнічалі дакументы на тавар.
- Пасля таго, як мы звярнулі ўвагу на праблему, антыманапольныя органы даслалі нам адказ, што яны праверылі азіяцкіх прадпрымальнікаў і знайшлі некаторыя парушэнні правілаў вядзення гандлю. Былі праблемы з сертыфікатамі, тавар не прабіваўся праз касавы апарат... Хоць азіяты працуюць па-ранейшаму, іх дзейнасць не прыпыненая. Магчыма, ім далі рэкамендацыі ліквідаваць парушэнні.
Зразумела, што проста так беларускі рынак яны не пакінуць, бо маюць за кошт нізкіх коштаў добры прыбытак.
- Адным словам, цяпер яны працуюць на законных падставах?
- У гэтай сітуацыі ёсць адзін цікавы момант. Справа ў тым, што замежным грамадзянам дазваляецца некалькі дзён на месяц гандляваць без дакументаў. Вось некаторыя і карыстаюцца гэтым. Некалькі дзён адзін гандляр з Азіі працуе без дакументаў, затым яго змяняе іншы, і так па ланцужку. Таму мы па-ранейшаму будзем грукацца ва ўсе дзверы, каб змяніць сітуацыю, бо беларускія прадпрымальнікі знаходзяцца ў дыскрымінацыйным стане.
Мы не супраць, каб азіяцкія гандляры працавалі ў Беларусі, але ўмовы для работы павінны быць роўнымі для ўсіх. Трэба паважаць тыя правілы і законы, якія ўстаноўлены для ўсяго прадпрымальніцкага асяроддзя.