Пад Асіповічамі грыбнік падарваўся на набоі

• 13.08.2017, 12:26

Мужчына з сынам і братам збіраў грыбы на вайсковым палігоне.

12 жніўня на вайсковым палігоне Рэпішча ў Асіповіцкім раёне загінуў мужчына. Пра гэта tut.by ананімна паведамілі мясцовыя жыхары. Факт гібелі пацвердзілі ў Пухавіцкім РАУС, супрацоўнікі якога выязджалі на месца здарэння.

Мужчына падарваўся на «неўстаноўленым боепрыпасе», паведамілі ў РАУС. На палігоне ён знаходзіўся разам з сынам і братам. Яны ад выбуху не пацярпелі.

Вайсковы палігон Рэпішча - дзейны, уваход туды закрыты. Аднак людзі збіраюць там грыбы, распавёў адзін з мясцовых жыхароў, які пажадаў застацца ананімным. Магчыма, загінулы таксама прыехаў туды па грыбы.

«У Асіповічах ёсць вайсковая частка (в/ч 12 147), а на гэтым палігоне праходзяць вучэнні. Там забаронена знаходзіцца, але па выхадных там не страляюць, таму людзі туды едуць, нягледзячы ні на што», - распавёў мясцовы жыхар. - «Я сам быў сведкам, як людзі збіраюць грыбы, знойдуць набой, у руках патрымаюць, кінуць, і далей пайшлі».