Валер Карбалевіч: Для змены ўлады ў Беларусі трэба сто тысячаў чалавек, якія не разыходзяцца
- 27.07.2017, 12:44
Сацыяльны выбух у Беларусі можа адбыцца ў любы момант.
Беларусі неабходныя свабодныя выбары прэзідэнта і парламента. Рада Беларускага нацыянальнага кангрэсу прыняла адпаведную заяву, у якой патрабуе ад уладаў неадкладна правесці новыя выбары пад міжнародным кантролем.
БНК: нязменнасць дзейнай улады завяла краіну ў тупік
Інтэлектуальны патэнцыял усёй вертыкалі на чале з Лукашэнкам далёка адстаў ад узроўню грамадства. Толькі як можна правесці свабодныя выбары ў беларускіх варунках? Гістарычны досвед паказвае, што такія змены магчымыя пры масавых народных пратэстах.
«Трэба, каб на вуліцы стаяў вялізны натоўп, дзесьці сто тысячаў чалавек, і каб гэты натоўп не разыходзіўся, людзі патрабавалі, стаялі і гатовыя былі змагацца за гэтыя выбары», – заявіў «Белсату» палітолаг Валер Карбалевіч.
Сацыяльны выбух можа адбыцца ў любы момант
Эксперты падкрэсліваюць, што сацыяльныя выбухі рэдка калі можна спрагназаваць – так было вясной сёлета, калі беларусы масава выходзілі ва ўсёй краіне і дамагліся адтэрміноўкі дэкрэта № 3.
Тым часам Беларускі нацыянальны кангрэс прызначыў блізкую акцыю пратэсту ўжо 8-га верасня. Маніфестацыя супраць правядзення расейскіх ваенных вучэнняў пройдзе на Кастрычніцкай плошчы ў Менску а 18 гадзіне.