Апублікаванае відэа інцыдэнту з беларускай у рымскім метро
- 18.07.2017, 11:39
Рэакцыя відавочцаў дзівіць.
11 ліпеня 43-гадовую жанчыну заціснула дзвярыма вагона і працягнула па пероне. Мяркуючы з запісаў камераў назірання, відавочцы не адважыліся адразу ж дапамагчы жанчыне.
Відэа апублікавала выданне Corriere Della Sera. Відаць, як пасажырка ў момант закрыцця дзвярэй ускоквае ў вагон адной нагой, а потым ідзе назад. Яе сумкі і рука апынаюцца заціснутымі.
Адзін з відавочцаў хапае яе за руку, але неўзабаве адпускае (ці жанчына яго сама адштурхвае). Астатнія мітусяцца на платформе і толькі махаюць рукамі машыністу – але беспаспяхова. Тым часам цягнік цягне жанчыну да тунэлю, а людзі толькі хапаюцца рукамі за галаву.
Дзверы троху расчыніліся і беларуска змагла вызваліцца. Вядома, што машыніст спыніўся толькі на наступнай станцыі, а сістэма не сігналізавала яму пра захрасанне.
Нагадаем, інцыдэнт адбыўся 11 ліпеня на станцыі Тэрміні у Рыме. У выніку 43-гадовая беларуска была шпіталізаваная з шматлікімі пераломамі.