У Менску прайшло свята літоўскай культуры
- 24.06.2017, 20:59
Жыхары сталіцы маглі набыць упрыгажэнні з бурштыну і прадэгуставаць цэпеліны.
Свята літоўскай культуры праходзіць у Верхнім горадзе 24 чэрвеня, паведамляе карэспандэнт агенцтва «Минск-Новости».
Папаўдні тут пачаўся канцэрт запрошаных фальклорных калектываў KAIMYNAI, MINIJA, Sеluona.
Непадалёк ад канцэртнай залы «Верхні горад» разгарнуліся гандлёвыя шэрагі, дзе сваю прадукцыю дэманструюць рамеснікі з Беларусі і Літвы. У майстроў можна набыць дзіўныя прадметы побыту і інтэр'ера, створаныя з дрэва, упрыгажэнні з бурштыну, плеценыя са скуры і пацерак аксесуары, шалі, зробленыя ў тэхніцы батык, свечкі ў выглядзе казачных персанажаў, сувеніры.
Не абышлося без нацыянальнай кухні: прадпрыемствы грамадскага харчавання прапануюць гасцям свята прадэгуставаць цэпеліны, кібінаі (традыцыйныя піражкі), коўнаўскія хот-догі і грог.
Дарэчы, жыхароў і гасцей сталіцы не спалохала надвор’е: многія, нягледзячы на дождж, аддалі перавагу правесці выходны ў гістарычным цэнтры горада.