Уніяты адзначылі Дзень усіх беларускіх святых
- 18.06.2017, 19:39
Гарадзенскія грэка-каталікі малітоўна ўспомнілі святых беларускага народа.
Адразу ў трох месцах – Гродне, Адамовічах і форте №2, што ў Навумавічах, – гарадзенскія грэка-каталікі малітоўна ўспомнілі святых беларускага народа, якія неслі асвету, культуру, выяўлялі самаадданасць за вялікі перыяд хрысціянскай гісторыі, паведамляе «Радыё Рацыя».
– Нашы святыя неслі святасць, хрысціянства да нас праз сваю пабожнасць і асвету. І гэта для нас, беларусаў, сёння надзвычай важна. Мы павінны жыць на прыклад гэтых святых і тых першых крокаў святасці ў нашым народзе Еўфрасінні Полацкай і Кірылы Тураўскага, памятаць, з чаго пачыналася наша святасць: з уласнага хрысціянскага жыцця і асветы, – кажа айцец Андрэй Крот.
На заканчэнне Дня ўсіх беларускіх святых сярод гарадзенскіх грэка-каталікоў традыцыйна праводзіцца малітоўная сустрэча ў форце №2, што ў вёсцы Навумавічы. Там падчас Другой сусветнай вайны нямецкія карнікі расстралялі мноства мірных жыхароў Гародні і ваколіцаў.
На месцы расстрэлу цяпер усталяваныя памятныя знакі: мармуровы крыж і табліца з імёнамі ўсіх загінулых.