Улюкаеву выстаўленае канчатковае абвінавачанне

• 23.05.2017, 19:45

Расследаванне крымінальнай справы ў дачыненні да былога міністра эканамічнага развіцця РФ закончанае.

Былому міністру эканамічнага развіцця Аляксею Улюкаеву выстаўленае абвінавачванне ў канчатковай рэдакцыі паводле справы аб карупцыі, паведаміла афіцыйная прадстаўніца Следчага камітэта Расеі Святлана Пятрэнка, павдамляе interfax.ru.

Паводле ейных слоў, Улюкаева абвінавацілі ў атрыманні хабару ў асабліва вялікай суме. Адвакаты былога міністра пакуль не пракаментавалі гэтую інфармацыю.

Аляксей Улюкаеў быў затрыманы ўночы 15 лістапада ў офісе «Раснафты». Паводле версіі следства, чыноўнік вымагаў два мільёны даляраў за станоўчую ацэнку ўгоды аб куплі «Башнафты». Улюкаеў адмаўляе віну. Пасля затрымання прэзідэнт РФ адхіліў міністра ад пасады. Цяпер Улюкаеў знаходзіцца пад хатнім арыштам.