Якуб Колас «парадніўся» з Луізай Бойд у Пінкавічах

• 8.04.2017, 13:29

Памятны знак аплаціла Амбасада ЗША.

У вёсцы Пінкавічы Пінскага раёна ў двары літаратурна-краязнаўчага музея Якуба Коласа адкрыты памятны знак у гонар амерыканскай вандроўніцы Луізы Арнэр Бойд, якая наведала Пінскае Палессе ў 1934 годзе падчас шматдзённай паездкі па ўсходняй ўскраіне тагачаснай Польшчы, піша «Вечерний Брест».

Сваімі ўражаннямі аб Палессі яна падзялілася ў часопісе «Геаграфічны агляд» за ліпень 1936 года, а вынікам экспедыцыі стала выданне ў 1937 годзе ў Нью-Ёрку фотаальбома «Польская правінцыя».

Памятны знак усталяваны на сродкі Пасольства ЗША ў Беларусі. На адным баку пастаўленага на невысокі пастамент шасьцікутніка выбітыя назвы населеных пунктаў Пінскага раёна, дзе 83 гады таму пабывала амерыканка-географ, і памятныя надпісы на беларускай і ангельскай мовах.