Вялікабрытанія ўпершыню за 135 гадоў пражыла дзень без выкарыстання вугалю

• 22.04.2017, 18:30

Астатнюю вугальную электрастанцыю ў Англіі плануюць зліквідаваць пад 2025 год.

Вялікабрытанія ўпершыню з часоў прамысловай рэвалюцыі правяла дзень без выкарыстання вугалю для генерацыі электрычнасці, піша lenta.ru.

21 красавіка стала першым днём без вугалю з 1882 года, калі ў Лондане быў уведзены ў эксплуатацыю першы цэнтралізаваны вугальны генератар. У кампаніі назвалі гэтую дату пераломным момантам для змены энэргетычнай сістэмы краіны.

Як паведамляецца на сайце National Grid, прыкладна палова энэргіі, вырабленай у краіне 21 красавіка, прыпала на газ, чвэрць — на атамныя электрастанцыі. Таксама былі задзейнічаныя ветраныя электрастанцыі і станцыі на біяпаліве, а частка электраэнэргіі набытая ў суседзяў.

У снежні 2015 года ў Брытаніі спыніла працу астатняя ў краіне глыбокая вугальная шахта — рудня Келінглі, размешчаная ў графстве Вэст-Ёркшыр.

Брытанскі ўрад пакрысе адмаўляецца ад вугальных электрастанцый, замяняючы іх атамнымі і газавымі электрастанцыямі. У 2016 годзе на вугальныя электрастанцыі прыпадала толькі блізу 9% энэргіі. Астатняе такое прадпрыемства плануецца зліквідаваць пад 2025 год. Гэта абумоўлена спробай улад знайсці баланс паміж скарачэннем выкідаў СО2 з патрэбай засцерагчы спажыўцоў ад росту коштаў.