На Падляшшы адзначылі Дзень роднай мовы беларускай дыктоўкай

• 21.02.2017, 19:38

Свае веды па беларускай мове правяралі не толькі вучні, але і беларускія грамадскія дзеячы і журналісты з Падляшша.

Традыцыяй Непублічнай школы імя святых Кірыла і Мяфодзія стала дыктоўка, якую пішуць менавіта 21 лютага. Сёлета свае веды па беларускай мове правяралі не толькі вучні, але і беларускія грамадскія дзеячы і журналісты з Падляшша. Пасля дыктоўкі як першыя, так і другія былі задаволеныя, паведамляе «Радыё Рацыя».

Калабухаў Юрый, Культурны цэнтр Беларусі ў Варшаве:

– Беларускую мову ведаю добра яшчэ з дзяцінства. Мая маці – настаўніца беларускай мовы, таму не хвалююся.

– Усё ж такі вельмі даўно не пісаў дыктоўкі, - адзначае журналicт Міхась Сцепанюк.

– Насамрэч – гэта была вельмі класная забава для ўсіх. Напэўна элемента спаборніцтва тут не было, - кажа яшчэ адзiн журналiст Зміцер Косцін.

– Дыктоўка ўжо ўпісалася ў наш школьны каляндар, таму дзеткі яшчэ з верасня ведаюць, што будуць пісаць беларускую дыктоўку, - каментуе настаўніца беларускай мовы Ёанна Марко.

– Дзень роднай мовы нагадвае, каб мы шанавалі сваю мову кожны дзень. Мова – гэта наша духоўнасць, - адзначе Яўген Вапа, старшыня ўправы Беларускага «Радыё Рацыя».

Дыктоўка была адным з пунктаў праграмы святкавання Дня роднай мовы ў Беластоку. Апроч таго ўдзельнікаў чакала мастацкая частка, падрыхтаваная вучнямі Непублічнай школы імя святых Кірыла і Мяфодзія і школы ў Нарве. Пра вынікі дыктоўкі даведаемся на наступным тыдні.