Знішчальнікі ЗША адкрылі папераджальны агонь па штурмавіку РФ у Сірыі

• 14.12.2017, 21:34

Знішчальнікі F-22 адкрылі папераджальны агонь, калі расейскія Су-25 уварваліся ў зону дээскалацыі над усходнім берагам Еўфрата.

Самалёты ВПС ЗША ў паветранай прасторы Сірыі перахапілі расейскія штурмавікі Су-25. Пра гэта паведамляе The Independent.

Са слоў неназванага амерыканскага чыноўніка, знішчальнікі F-22 ВПС ЗША выпусцілі некалькі ілжывых цеплавых мэт, (якія нагадваюць сігнальныя ракеты) пасля таго, як расейскія самалёты Су-25 парушылі ўзгодненую зону палётаў, створаную для пазбягання ненаўмысных інцыдэнтаў. Пасля папярэджання расейскія самалёты пакінулі гэты раён.

Са слоў амерыканскіх крыніц, сітуацыя развівалася некалькі хвілін, бо Су-25 некалькі разоў парушалі размежавальную лінію. Як піша выданне, раней Цэнтральнае камандаванне ВПС ЗША ўказвала на тое, што расейскія самалёты рэгулярна ўрываюцца ў зоны, што кантралююцца амерыканскай авіяцыяй.