Ісламскія краіны прызналі Усходні Ерусалім сталіцай Палестыны

• 13.12.2017, 18:26

Арганізацыя ісламскага супрацоўніцтва заклікае сусветную супольнасць прызнаць Усходні Ерусалім акупаванай сталіцай Палестынскай дзяржавы.

Удзельнікі пазачарговага саміту Арганізацыі ісламскага супрацоўніцтва (АІС), які праходзіць у Стамбуле, у сераду, 13 снежня, прызналі Усходні Ерусалім сталіцай Палестыны. Праект рэзалюцыі саміту, які цытуе агенцтва Reuters, абвяшчае «Усходні Ерусалім сталіцай Палестынскай дзяржавы і заклікае ўсе краіны прызнаць дзяржаву Палестыну з Усходнім Ерусалімам у якасці яго акупаванай сталіцы», паведамляе DW.

У дакуменце таксама адзначана, што лідары мусульманскіх краін разглядаюць пастанову Вашынгтона ў аднабаковым парадку прызнаць Ерусалім сталіцай Ізраіля як знак таго, што ЗША спыняюць выконваць ролю пасярэдніка ва ўрэгуляванні палестына-ізраільскага канфлікту.