На МКАД фургон збіў апору лініі электраперадачы

• 12.12.2017, 21:19

Участак знешняга кола застаўся без святла.

На МКАД грузавы аўтамабіль збіў апору лініі электраперадачы, пакінуўшы на гадзіну ўчастак знешняга кола без святла. Як паведамляе БелТА, у ДТЗ абышлося без пацярпелых.

Аварыя адбылася пасля 16.00 12 снежня на знешнім коле МКАД у раёне скрыжавання з вуліцай Рафіева. Кіроўца грузавіка накіроўваўся з боку вуліцы Шаранговіча на вуліцу Громава. У нейкі момант мужчына страціў пільнасць, у выніку фургон урэзаўся ў апору, затым з'ехаў у кювет і перакуліўся.

На шчасце, сам кіроўца не пацярпеў, аднак участак знешняга кола на час застаўся без асвятлення, таксама ўтварыўся затор.

Супрацоўнікі УП «Менгарсвятло» праверылі пашкоджаны слуп апоры, правялі аварыйна-рамонтныя работы. Асвятленне адноўленае.