Карціну Марка Шагала прадалі за $28,4 мільёна

• 15.11.2017, 11:57

Карціна была намаляваная ў 1928 годзе.

Карціна сусветна вядомага мастака Марка Шагала «Каханкі» («Les Amoureux»), якая паказвае мастака ў абдымках з ягонай першай жонкай і музай, Бэлай Розэнфельд, была прададзеная за 28,4 мільёна даляраў на аўкцыёне Sotheby's, піша The New York Times (пераклад - tut.by).

Як паведамілі прадстаўнікі Sotheby's, карціна была намаляваная ў 1928 годзе і адразу пасля гэтага была набытая сям'ёй, якая і выставіла працу на продаж. Першапачаткова «Les Amoureux» ацэньваліся на 18 мільёнаў даляраў.

Імя цяперашняга пакупніка не называецца. Вядома толькі, што ягоныя інтарэсы прадстаўляла кіраўніца маскоўскага офіса Sotheby's Ірына Сцяпанава. Таму, можна меркаваць, што цяперашні ўладальнік карціны - з Расеі.

Свайго новага ўладальніка знайшло і палатно Шагала «Вялікі цырк» («Le Grand Cirque»), намаляванае ў 1956 годзе. На карціне былі намаляваныя акрабаты і блазны. Праца ацэньвалася на 15 мільёнаў даляраў і была прададзеная за 16 мільёнаў даляраў калекцыянеру з Азіі.