Леанід Заіка: Гэта тое ж самае, што паставіць чум замест будынка адміністрацыі Лукашэнкі

• 19.10.2017, 16:59

Улады не могуць развязаць праблему з прыцягненнем маладых спецыялістаў у рэгіёны.

Як паведаміў прадстаўнік «савета рэспублікі» Віктар Сірэнка, дзяржава плануе «прапрацаваць жыллёвыя пытанні і пытанне зніжэння падатковай нагрузкі для маладых спецыялістаў у вёсцы». На ягоную думку, гэта «дапаможа зацікавіць моладзь» пераязджаць з буйных гарадоў у рэгіёны.

- Гэта абсалютна не дапаможа развязаць праблему, - кажа «Салiдарнасцi» вядомы эканаміст Леанід Заіка. - Маладыя спецыялісты паедуць у рэгіёны тады, калі ў іх там будзе ўласны дом. Наогул падаткі павінны плаціць усе, асабліва падаходны падатак. У нас цяпер стаўка для ўсіх аднолькавая. Глупстваў на гэтую тэму рабіць не трэба: варта толькі знізіць адным падаходны падатак, як гэта выкліча ланцуговую рэакцыю. Я мяркую, гэты захад нават проста небяспечны.

На думку суразмоўцы, прапаноўваць кватэры ва ўласнасць маладым спецыялістам - таксама не варыянт:

- У сельскай мясцовасці кватэра - гэта нонсэнс. Гэта тое самае, што паставіць чум замест будынка адміністрацыі Лукашэнкі. Гэта недарэчна. У нас жа зямлі дастаткова, дастаткова будматэрыялаў - таму трэба пераходзіць на будаўніцтва сямейных дамоў. Можна з Мурманска выпісаць прыгожыя цёплыя драўляныя дамы, і гэта будзе нядорага.

На думку Леаніда Заікі, пра праблему з прыцягненнем маладых спецыялістаў кажуць усе, каму не лянота. Аднак, яна не развязваецца.

І раіць:

- Проста дайце людзям зямлю.