У Лідзе знік помнік Леніну
- 18.10.2017, 11:43
Ільіч знаходзіўся побач з вайсковай часткай.
З Чырвонаармейскай вуліцы ў Лідзе знік помнік расейскаму бальшавіку Уладзіміру Леніну. Аб знікненні Леніна напісаў у «Фэйсбуку» прадстаўнік Беларускага Нацыянальнага Кангрэсу ў Лідзе Валерый Мінец.
Інфармацыю svaboda.org пацвердзіў жахар Ліды, які праходзіў побач і ўбачыў, што пастамент, дзе стаяў помнік, пусты.
Як даведаліся журналісты, помнік Леніну знік прыблізна месяц таму. Ён знаходзіўся побач з вайсковай часткай, у непрыкметным месцы. Таму яго знікненне заўважылі не адразу.
Пакуль невядома, дзе знаходзіцца помнік Леніну. З ранейшых здымкаў відаць, што ён быў у дрэнным стане. Жыхары Ліды не выключаюць, што яго маглі накіраваць на рэстаўрацыю з нагоды 100-годдзя бальшавіцкага перавароту.
У Лідзе Уладзіміру Леніну не шанцуе не ўпершыню. У кастрычніку 2016 года помнік Леніну ў цэнтры горада аблілі чырвонай фарбай. Сёлета ў сакавіку мясцовы жыхар Мікалай Мякшыла спрабаваў нанесці на помнік надпіс «Сатана». За гэта яго асудзілі на год «хатняй хіміі».