У Беларусі зніжаюцца стаўкі валютных укладаў

• 5.01.2017, 15:12

Гэта звязанае з чарговымі новаўвядзеннямі Нацбанку.

Учора Нацбанк абвясціў аб тым, што з 18 студзеня стаўка рэфінансавання знізіцца на адзін адсотак - з 18% да 17%. Гэта азначае, што стаўкі ў крэдытах і дэпазітах, у першую чаргу рублёвых, таксама стануць меншымі, піша kp.by.

Аднак стаўкі ў валютных укладах таксама пойдуць уніз. Гэта звязанае з яшчэ адной навіной Нацбанку - зменай сумы ўзносаў у фонд абавязковых рэзерваў, якія робяць усё банкі з атрыманых укладаў. Цяпер у фонд трэба пералічваць 7,5% ад сумы па-за залежнасцю ад валюты ўкладу. Аднак з 1 лютага для рублёвых дэпазітаў сума адлічэнняў паменшыцца да 4%, а для валютных, наадварот, павялічыцца да 11%. Груба кажучы, рублёвыя ўклады стануць для банкаў больш выгаднымі за валютныя.

- У гэтай сітуацыі ў банкаў ёсць некалькі варыянтаў паводзін. Адны могуць нічога не змяняць у адсоткавай палітыцы і пайсці на змяншэнне сваёй маржы (гэта значыць, пачаць зарабляць менш). Хтосьці можа абмежаваць прыцягненне валютных дэпазітаў кліентаў і звярнуцца па рэсурсную падтрымку да матчыных банкаў, калі ў іх ёсць такая магчымасць, - тлумачыць топ-мэнэджар аднаго з банкаў. - Яшчэ адзін варыянт - павялічыць стаўкі ў валютных крэдытах для прадпрыемстваў, каб кампенсаваць дадатковыя выдаткі на фонд абавязковых рэзерваў за кошт адсоткаў. Але цяпер банкі актыўна канкуруюць за надзейных пазычальнікаў, таму такія крокі ўсё ж малаімаверныя. Хутчэй за ўсё, большасць знізяць стаўкі ў валютных укладах. Зніжэнне будзе прыблізна 0,5% гадавых - гэтага хопіць, каб кампенсаваць выдаткі на павялічаныя адлічэнні ў фонд абавязковых рэзерваў.