Жыхар Віцебска дамогся зняцця рэкламы канцэртаў Віктара Каліны
- 23.01.2017, 17:43
Чыноўнікі адказалі Сяргею Сясіцкаму на просьбу забараніць канцэрты беларускага шансанье, які падтрымлівае баевікоў Данбаса.
Некалькі дзён таму жыхар Віцебска Сяргей Сясіцкі адправіў у Віцебскі аблвыканкам зварот наступнага зместу:
«Паводле інфармацыі з сеціва на тэрыторыі Віцебскай вобласці плануецца правядзенне канцэртаў выканаўцы шансона Віктара Каліны.
Згодна з «Палажэннем аб правядзенні культурна-масавых мерапрыемстваў», зацверджанага ўказам Лукашэнкі ад 19.10.2010 N542 «Аб правядзенні культурна-відовішчных мерапрыемстваў» забараняецца правядзенне мерапрыемстваў:
- Якія маюць на мэце вядзенне прапаганды вайны ці экстрэмісцкай дзейнасці;
- Якія прадстаўляюць пагрозу нацыянальнай бяспецы, грамадскаму парадку, маральнасці і здароўю насельніцтва, правам і свабодам грамадзян...
Пакінуўшы за дужкамі крымінальную тэматыку «творчасці» і асобу гэтага выканаўцы, выклікаюць абурэнне ягоныя адкрыта хамскія і зневажальныя каментары, пагрозы на адрас нашых суграмадзян, гарадоў і агулам Рэспублікі Беларусь, званай ім у сеціве «Фэйсбук» «беларашкай», а так жа інфармацыя пра ягоны ўдзел у баявых дзеяннях ва Украіне на баку незаконных фармаванняў, піша nn.by.
Мяркуючы, што публічная гастрольная дзейнасць гэтага грамадзяніна наўпрост супярэчыць нацыянальным інтарэсам Рэспублікі Беларусь, пагражае грамадзянскаму свету ў нашай краіне, прашу разгледзець пытанне аб адмове ў выдачы яму гастрольных пасьведчанняў і аб адклiканнi ўжо выдадзеных».
Сёння Сяргею Сясіцкаму прыйшоў адказ з Віцебскага аблвыканкама.
«Дык вось.
1. Ідэолагі прымусілі яго прыбраць рэкламу, але толькі чамусьці ў Віцебскай вобласці. Трэба меркаваць, на канцэрты ў іншых абласцях дазволы ёсць, ці там законы Беларусі працуюць неяк па-іншаму.
2. Ад ацэнкі ягоных хамскіх выказванняў чакана ўхіліліся.
Што рабіць далей?
1. Накіраваць аналагічныя лісты ў астатнія аблвыканкамы.
2. Назіраць за сайтам «спевака».
Калі на ім з'явіцца аддаленая інфармацыя аб канцэртах, або яны адбудуцца без рэкламы, то, значыць, дазволы атрыманыя, а дзяржаўная ідэалогія не пярэчыць супраць абраз Рэспублікі Беларусь і яе грамадзян», - рэзюмуе ў «Фэйсбуку» Сясіцкі.