Трампу давялося прадаць свой Android-смартфон

• 20.01.2017, 16:55

Прэзідэнт ЗША будзе карыстацца спецыяльнай, звышабароненай прыладай, адобранай Сакрэтнай службай Белага дома.

За дзень да інаўгурацыі Дональду Трампу давялося прадаць свой Android-смартфон, паведамляе New York Times. Раней абраны прэзідэнт ЗША выкарыстоўваў гаджэт Samsung, а цяпер яму выдадуць спецыяльную, звышабароненую прыладу, ухваленую Сакрэтнай службай Белага дома.

Да Барака Абамы прэзідэнты не карысталіся асабістымі тэлефонамі ў мэтах бяспекі. Аднак у 2009 годзе новаму прэзідэнту дазволілі пакінуць яго Blackberry, значна абмежаваўшы функцыі прылады і максімальна абараніўшы яе. Пазней ён змяніў яго на нейкі іншы смартфон без магчымасці рабіць званкі, устаноўкі дадаткаў, без камеры і музычнага плэера.

Затым Абама стаў выкарыстоўваць спецыяльную версію iPhone, якая дазваляе адпраўляць і прымаць e-mail ад абмежаванай групы людзей, а таксама выкарыстоўваць браўзэр. Магчыма, ужо заўтра прэзідэнт, які сышоў са сваёй пасады, абновіць свой смартфон на якую-небудзь поўнафункцыянальную прыладу.