Лукашэнка не можа падтрымліваць сваю «мадэль»

• 10.01.2017, 10:11

У дыктатара скончыліся грошы.

Дзяржава ў 2017 годзе рэзка скараціць дырэктыўнае крэдытаванне. Эканамічныя ўлады наважылі выдаць толькі 1,9 млрд дырэктыўных крэдытаў - цяперашняя сума дзяржаўнай падтрымкі меншая, чым была летась, паведамляе ej.by.

У дакуменце зацверджаны агульныя напрамкі і ліміты дырэктыўнага крэдытавання дзяржаўных праграм і мерапрыемстваў і іх крэдытавання банкамі, а таксама план фінансавання Банкам развіцця на 2017 год.

У тым выпадку, калі крэдытаванне будзе перавышаць прыняты на 2017 год ліміт, яно будзе ажыццяўляцца без дзяржаўнай падтрымкі. Іншае можа быць ўстаноўлена заканадаўчымі актамі.

Такім банкам, як «Беларусбанк», «Белаграпрамбанк», «БПС-Ашчадбанк», «Белзнешэканомбанк», «Прыорбанк», «Парытэтбанк» прапанавалі ў 2017 годзе выдаваць дырэктыўныя крэдыты, у тым ліку крэдыты на жыллё і на будаўніцтва аб'ектаў у рамках дзяржпраграм. Праўда, з агаворкай «пры наяўнасці рэсурсаў».

Нагадаем, што рэзкае скарачэнне дзяржпадтрымкі пачалося яшчэ ў 2016 годзе.

Паводле звестак Міністэрства фінансаў, у студзені—верасні 2015 года аб'ём дзяржпадтрымкі, аказанай юрыдычным асобам і індывідуальным прадпрымальнікам, складаў 1,07 млрд дэнамінаваных рублёў. Такім чынам, у параўнанні са студзенем—вераснем мінулага года аб'ём дзяржпадтрымкі эканомікі скараціўся больш чым у 3,5 разы.

Найбольшая сума дзяржпадтрымкі (роўны 243,9 млн. рублёў), аказаная прадпрыемствам, была выдадзена ў выглядзе пазык, што ў 3,13 разы меншыя ў параўнанні са студзенем—вераснем 2015 года. На пакрыццё часткі адсоткаў за карыстанне крэдытамі бюджэт выдаткаваў амаль 47 млн. рублёў, што ў 3,4 разы менш у параўнанні з 9 месяцамі 2015 года.