Для прадпрымальнікаў рыхтуюць чарговы штраф
- 30.09.2016, 14:41
Падаткавікі ўвядуць адказнасць за адсутнасць электронных рахункаў-фактур.
Чарговыя штрафы для ІП могуць з'явіцца ў 2017 годзе. Са словаў намесніцы начальніка аддзела ўскоснага падаткаабкладання галоўнай управы метадалогіі падаткаабкладання арганізацый МПЗ Святланы Яськовай прапрацоўваецца пытанне аб увядзенні адміністрацыйнай адказнасці за адсутнасць электронных рахункаў-фактур.
Пра гэта яна заявіла падчас онлайн-канферэнцыі на сайце БелТА.
З 1 студзеня 2017 года плацельшчыкі ПДВ змогуць выкарыстоўваць для выліку толькі электронныя рахункі-фактуры. Будзе выключанае ўжыванне рахункаў-фактур, аформленых на папяровых носьбітах.
Таксама ў законапраекце пра змены ў падатковым кодэксе ў 2017 годзе прадугледжваецца зрушэнне агульнага тэрміну афармлення электронных рахункаў-фактур з 5 на 10 чысло месяца, наступнага за фактычнай адгрузкай тавараў, выкананнем работ або паслуг.
Камеральны кантроль, са словаў Святланы Яськовай, будзе даступны карыстальнікам АІС у кастрычніку. З яго дапамогай яны змогуць спраўджваць атрыманыя і пададзеныя рахункі-фактуры з падатковымі дэкларацыямі.
МПЗ ацэньвае працу аўтаматызаванай сістэмы, як досыць стабільную.