На праспекце Незалежнасці збіраюць подпісы за бел-чырвона-белы сцяг
- 24.09.2016, 15:08
24 верасня з 11 раніцы на менскім праспекце Незалежнасці праходзіць збор подпісаў за наданне бел-чырвона-беламу сцягу статусу гістарычна-культурнай каштоўнасці.
Акцыю правялі актывісты «Маладога фронту» і аргкамітэта партыі «Беларуская хрысціянская дэмакратыя». Раніцай быў затрыманы міліцыянтамі адзін з арганізатараў збору подпісаў Зміцер Дашкевіч, на акцыі ён так і не з'явіўся.
Таксама актывісты не дачакаліся Сяргея Пальчэўскага, які меў прывезці зборшчыкам подпісаў спецыяльную расцяжку, якая б інфармавала пра акцыю. Сяргей Пальчэўскі, паводле звестак «Маладога фронту», быў затрыманы на ўваходзе ў метро. Іншых зборшчыкаў подпісаў міліцыянты не затрымлівалі і не перашкаджалі ім падчас акцыі, перадае «Радыё Свабода».
У зборы подпісаў каля ўніверсама «Цэнтральнага» ўзялі ўдзел вядомыя асобы: пісьменнік Уладзімір Арлоў, паэт і палітык Уладзімір Някляеў, мастак Аляксей Марачкін.
Во второй половине дня сборщики подписей переместились с тротуаров в подземный переход возле станции метро «Октябрьская».
У другой палове дня зборшчыкі подпісаў перасунуліся з ходнікаў у падземны пераход каля станцыі метро «Кастрычніцкая».
Са слоў актывіста БХД Паўла Пракаповіча, за мінулыя 4 дні ў Менску было сабрана блізу тысячы подпісаў за бел-чырвона-белы сцяг.
«Гэтую лічбу мы плануем шматразова павялічыць, бо людзі падпісваюцца ахвотна і актыўна», - сказаў Павел Пракаповіч.
Далей актывісты мерацца перадаць сабраныя подпісы гарадскім уладам.