У рухавік самалёта «Белавія» трапіла птушка: пасажыры 12 гадзін чакалі вылету
- 10.08.2016, 17:17
Праз тое, што пасажыры ўжо прайшлі памежныя працэдуры, ім давялося некалькі гадзін чакаць вылету ў транзітнай зале.
У нядзелю ранішнім рэйсам мянчанка Святлана з сям'ёй павінны былі адправіцца з балгарскага Бургаса ў Менск. Але неўзабаве пасля ўзлёту самалёт пайшоў на пасадку. Высветлілася: у рухавік трапіла птушка. У «Белавія» кажуць, гэта першы такі інцыдэнт з пачатку года, піша tut.by. Пасажыраў жа неардынарнасць сітуацыі не ўразіла. «Мы 12 гадзін праседзелі на металічных лавах у аэрапорце, чакаючы наступнага рэйса, - абураная Святлана. - Я збіраюся звяртацца ў авіякампанію наконт кампенсацыі».
- Як толькі самалёт стаў заводзіцца, муж звярнуў увагу на нейкі дзіўны трэск, але што гэта, ніхто не ведаў, - успамінае тую раніцу субяседніца. - Калі сталі зніжацца, мы вельмі перапалохаліся. Думалі, зараз разаб'емся. А потым даведаліся: у рухавіку птушка.
Са словаў пасажыркі, наступны самалёт прыбыў па іх з Менска толькі ўвечары. А 20.35 яны вылецелі на радзіму.
- Увесь гэты час мы прасядзелі ў невялікім аэрапорце на металічных лавах, - абураная Святлана. - Вядома, дзякуй, што нас пакармілі, але чаму не засялілі ў гатэль?! Таму што многія, каб патрапіць у Бургас да 8.00, паўставалі а 4 раніцы. На борце было чалавек 20 дзяцей. У мяне самой чатырохгадовая дачка. Чаму яна пасля адпачынку павінна паўдня пакутаваць?! Але больш за ўсё мне было шкада цяжарную жанчыну, якая ўвесь гэты час сядзела побач з намі. З ёй было яшчэ і прастуджанае дзіця. Уявіце, як ёй?
Цяпер Святлана збіраецца пісаць заяву ў авіякампанію.
- Я б хацела, каб усім пасажырам выплацілі кампенсацыю. І за тое, што мы пакутавалі цэлы дзень, і за стрэс. Прадстаўце, як пасля гэтага было сесці ў самалёт і зноў узлятаць?!
У «Белавія» пацвердзілі: сапраўды, рэйс, які 7 жніўня 2016 года а восьмай раніцы вылецеў з Бургаса ў Менск, неўзабаве пасля ўзлёту зноў зрабіў пасадку ў тым жа балгарскім аэрапорце. У рухавік трапіла птушка, і пілот наважыў вярнуцца. У сувязі з тым, што самалёт атрымаў пашкоджанні, наважылі накіраваць у аэрапорт Бургаса рэзервовае паветранае судна.
- Людзей размясцілі ў транзітнай зале, дзе з імі ўвесь час знаходзіўся супрацоўнік аэрапорта, - распавядаюць у прэс-службе авіякампаніі. - Ён падаваў ім усю неабходную інфармацыю. Пасажырам арганізавалі двухразовае гарачае харчаванне, а дзіцяці, якое адчула боль у вушах, тут жа надалі медыцынскую дапамогу. У сувязі з тым, што пасажыры прайшлі памежныя і мытныя працэдуры, у многіх былі закрытыя візы, большасць з іх не маглі пакінуць стэрыльную зону аэрапорта Бургаса. Варта ўлічыць, што лета - гэта напружаны сезон. Усе самалёты задзейнічаныя на розных кірунках, і знайсці свабодны досыць складана.
У авіякампаніі распавялі, што сітуацыі, калі птушка трапляе ў рухавік самалёта, належаць да абставін непераадольнай сілы. Здараецца такое вельмі рэдка. З пачатку года ў «Белавія» - гэта першы такі інцыдэнт.