На трасе M3 Volkswagen вылецеў на сустрэчную паласу пад фуру

• 13.07.2016, 10:47

Два чалавекі - кіроўца і пасажырка легкавіка загінулі.

У выніку пярэдняга сутыкнення на трасе Віцебск - Менск у легкавым аўтамабілі былі заблакаваныя загінулыя кіроўца і пасажырка. Спатрэбілася дапамога ратавальнікаў, каб выняць целы. Паводле інфармацыі МНС, Volkswagen Passat рэзнуўся ў аўтацягнік Renault. У міліцыі паведамілі, што менавіта кіроўца легкавіка выехаў на паласу сустрэчнага руху.

«Аварыя адбылася паблізу вёскі Пагарэлае Лепельскага раёна на адцінку М3, - паведамілі ў МУС. - Жыхар Віцебска, маладзён 1994 года нараджэння, кіруючы Volkswagen, выехаў на паласу сустрэчнага руху і сутыкнуўся з грузавым Renault».

У выніку здарэння кіроўца Volkswagen і пенсіянерка, якая ехала з ім (1938 года нараджэння), загінулі.