Спякота можа пакінуць беларусаў без бульбы

• 27.06.2016, 18:12

Варункі надвор'я таксама спрыяюць павелічэнню колькасці каларадскага жука.

Варункі для ўтварэння і росту клубняў бульбы ў Беларусі пагоршыліся, паведамілі interfax.by ў Рэспубліканскім гідраметцэнтры.

Цяпер на большасці плошчаў у бульбы працягваецца ўтварэнне суквеццяў, у шмат якіх раёнах пачалося красаванне - ідзе фармаванне і рост клубняў.

"Візуальныя ацэнкі стану бульбяных палеткаў збольшага добрыя. Аднак праз усталяванне гарачага надвор'я аграметэаралагічныя варункі для ўтварэння і росту клубняў бульбы пагоршыліся", - канстатавалі аграсіноптыкі.

Яны адзначылі, што сярэдняя тэмпература на большай частцы тэрыторыі краіны цяпер значна вышэйшая за аптымальную для фармавання клубняў. Паводле звестак асобных метэастанцый у Гомельскай вобласці на фоне высокага тэмпературнага рэжыму і нястачы глебавай вільгаці пачалося завяданне бульбы. Варункі надвор'я таксама спрыяюць павелічэнню колькасці каларадскага жука.

"Да канца чэрвеня і на пачатку ліпеня чаканы павышаны тэмпературны рэжым будзе па-ранейшаму ўскладняць варункі для фармавання ўраджаю бульбы", - дадалі аграсіноптыкі.