Сімвал беларуска-лужкоўскай дружбы - банкрут

• 22.06.2016, 18:41

Суд задаволіў заяву «Маскоўскай інвестыцыйнай будаўнічай кампаніі» пра ўласную эканамічную неплацежаздольнасць.

Заяву аб уласнай эканамічнай неплацежаздольнасці ў Эканамічны суд Менска накіравала «Маскоўская інвестыцыйная будаўнічая кампанія" - адзін з сімвалаў цесных кантактаў экс-мэра Масквы Юрыя Лужкова з беларускім кіраўніцтвам, піша «Ежедневник».

Амбіцыйны дэвелапер, заснавальнікам якога стаў Урад Масквы, выйшаў на беларускі рынак у 2006 годзе. МІСК стау ўпаўнаважанай кампаніяй урада Масквы ў рэалізацыі двух інвестыцыйных праектаў у Менску - будаўніцтва жылых кварталаў агульнай плошчай звыш 2 млн кв. метраў. Адзін з іх - гэта квартал «Маскоўскі» ў выглядзе некалькіх хмарачосаў на пр. Газеты «Праўда», другі (так і застаўся на паперы пагаднення) - жылы квартал у «Лябяжым».

Пасля адстаўкі Юрыя Лужкова ўрад Масквы выйшаў з праекту, у яго некаторы час спрабавалі інвеставаць расейскія прыватныя інвестары.

Як сказана ў судовых дакументах, суд задаволіў заяву МІСК і ўвёў на прадпрыемстве ахоўны перыяд. Ён будзе дзейнічаць да канца лістапада гэтага года.