Дырэктар з Ліды скраў у прадпрыемства 70 тысяч даляраў і знік

• 3.05.2016, 14:48

Жыхар Ліды ўвайшоў у давер да заснавальнікаў прадпрыемства, угаварыў іх купіць офісную мэблю, а грошы забраў сабе.

Выконваючы абавязкі дырэктара закрытага акцыянернага таварыства з замежным капіталам у Лідзе мужчына ўвайшоў у давер да заснавальнікаў і прапанаваў купіць на прадпрыемства танную офісную мэблю. Арганізаваў перавод амаль 1,38 млрд рублёў на разліковыя рахункі ілжывых прадпрымальніцкіх структур. Потым грошы зняў і схаваўся. Усё гэта адбывалася ў 2013 годзе. У дачыненні да дырэктара распачатая крымінальная справа паводле ч.4 арт.210 КК Беларусі («крадзеж грошай шляхам злоўжывання службовымі паўнамоцтвамі ў асабліва значнай суме»). Раней 40-гадовы мужчына ўжо быў судзімы за карыслівыя злачынствы, у тым ліку карупцыйныя, звязаныя з махлярствам, выманьваннем крэдытаў і атрыманнем хабару, паведамляе «Вячэрні Гродна».

Абставіны справы высвятляюцца, правяраецца фінансава-гаспадарчая дзейнасць прадпрыемства. Усталёўваюць, дзе цяпер знаходзіцца падазраваны і скрадзенае ім, хто стварыў лжэпрадпрымальніцкія структуры.