Віталь Гуркоў адправіў у накаўт украінца Пержаноўскага
- 24.05.2016, 19:41
Гэта другая запар перамога Віталя Гуркова на чэмпіянаце свету ў муай-тай.
Пра гэта Віталь Цішураў паведаміў у «Фэйсбуку», інфармуе charter97.org.
«Выступленне нашай каманды на Чэмпіянаце свету ў тайскім боксе ў Швэцыі:
- В.Гурко з украінцам Станіславам Пержаноўскім. Перамога датэрміновая (накаўт у 1 раўндзе, каленам у корпус).
- Р.Доўнар супраць літоўца. Перамога ў балах.
- А.Ванакаў супраць швэда. Перамога ў балах.
Наперадзе сёння яшчэ 4 баі», - гаворыцца ў паведамленні.
Нагадаем, 17 траўня, наш шматразовы чэмпіён свету ў муай-тай і заслужаны майстар спорту Віталь Гуркоў вылецеў у швэдскі Ёнчапінг, дзе праходзяць спаборніцтвы.
Чэмпіянат свету яшчэ да яго пачатку даецца Віталю Гуркову няпроста. У сакавіку баец, які паралельна займаецца творчай дзейнасцю ў складзе гурта Brutto, нечакана для многіх вярнуўся ў рынг і перамог на чэмпіянаце Беларусі. Неўзабаве стала вядома, што байца выключылі са спісу ў Мінспорце, і на ягоную паездку ў Швэцыю няма грошай.
Беларусы ў рамках праекта «Народны чэмпіён» за лічаныя гадзіны сабралі для Гуркова патрэбную суму. Праўда, пазней стала вядома, што Федэрацыя муай-тай усё ж знайшла грошы для байца ў дзяржбюджэце.
Акрамя Гуркова (75 кг) у складзе нацыянальнай каманды выступяць і іншыя зоркі сусветнага маштабу. Гэта перш за ўсё Андрэй Кулебін (71 кг), Дзмітрый Варэц (67 кг) і Дзмітрый Валент (81 кг).
Чэмпіянат скончыцца 28 траўня.